26. 10. 2021: В Празї одбуде ся 20-та стрїча народностных меншын. Буде конференція і културный ґалавечур
По конференції одбуде ся културный проґрам в режії меншын, котрого моттом є ласкавость.
4-го новембра 2021-го року одбуде ся в Празї вже 20-та стрїча народностных меншын вєдно із конференціёв під назвов Рефлексії і перспектівы народностных меншын.
Акція, котра буде проходити в Новій будові Народного музея, одбуде ся під покровительством Ганы Тжештіковой, радной Главного міста Прагы про область културы, выставництва і турістічного руху. Стрїча і конференція є орґанізована Главным містом Прага вєдно з Домом народностных меншын в Празї і Народным музеём.
На конференції і рефераты о Русинах
Конференція буде мати два блокы: Людьскы права в контекстах і Блок Академії народностных меншын: візії і рефлексії.
В в рамках народностного блоку будуть мати Русины аж двох представителїв. Аґата Пілатова, родачка з Ужгорода, котра є довгорічнов новинарьков і публіцістков, русиньсков актівістков і бывшов председкынёв Общества приятелїв Підкарпатьской Руси, буде мати реферат на тему Підкарпатьска Русь і Русины як жыва тема. Історія і сучасность. Науковцї, публіцісты, штуденты, верейность.
Другов выступаючов із рефератом буде директорка Словацького народного музея – Музея русиньской културы в Пряшові Люба Кральова. Тота одпрезентує тему Русины на Словакії в трансформачных процесах по 1989-ім роцї (шпеціфічны проблемы языковой і народной саморефлексії).
Почас конференції одбуде ся і святочне вручаня Оцїнїня председы Комітету про народностны меншыны Заступительства Главного міста Прагы за вынятковый вклад в области жывота народностных меншын в Празї.
Културный ґалавечур
По науковій части буде проґрам продовжовати вечерным културным проґрамом під назвов Laskavost – medzi lidmi most (Ласкавость – меджі людми міст). Ґалавечур буде цїлый присвяченый културї і уменю, а буде цїлый в режії представителїв народностных меншын.
Представлять ся музичны і танечны ансамблї, як і далшы умелцї, котры одпрезентують уменя, яке выходить з богатых културных традіцій того котрого народа.
Ґалавечур є завершінём довгодобого проєкту з єднаков назвов, котрый приносив до матерьскых школ, школ, домів про сеніорів інформації о народностных меншынах, котры жыють в Чеській републіцї.
Як пишуть орґанізаторы, од януара до фебруара 2021-го року ся орґанізовали розлічны бісїды, освітнї проґрамы, компонованы театралны проґрамы, котрых цїлём было творити мосты меджі народами і ґенераціями, і то посередництвом взаємной ласкавости, котра є і моттом цїлого проєкту.
І в рамках того проґраму одпрезентують ся Русины. Цілый проґрам конференції і културного ґалавечора собі можете посмотрити ту.
Дубаёвы в Празї
Присутность директоркы русиньского музея на конференції схоснує і Словацькый дім в Празї. Вєдно із Карпаторусиньскым краяньскым центром, Общінов Словаків у Чеській републіцї і Урядом про Словаків жыючіх в загранічу о день пізніше, 5-го новембра, орґанізує бісїду з Любов Кралёвов о выставці Дубаёвы – Анна і їй дїти, котра в місяцях юн аж октобер была наіншталована в СНМ – Музею русиньской културы в Пряшові.
Петро МЕДВІДЬ, Лем.фм. Ґрафічна языкова управа: ред. АРК в СР.