26. 10. 2021: В Маріяповчі припомянули собі 30 років од навщівы Папы Йоана Павла ІІ.

Навщіва Папы была великым імпулзом про восточны католицькы церькви реґіону.

Як інформує Пресовый центер Кошыцькой єпархії (TSKE), в днях 21-го і 22-го октобра 2021-го року в стародавнім ґрекокатолицькім путницькім центрї – в Маріяповчі, одбыла ся конференція з нагоды 30-ой річніцї навщівы Папы св. Йоана Павла ІІ.

На події выступали представителї церьковного, сполоченьского і політічного жывота з Мадярьска, Словакії, Україны, Румунії і Польщі. Св. Йоан Павел ІІ. пришов до Маріяповчі на стрїчу з ґрекокатоликами в неділю, 18-го авґуста 1991-го року, в рамках своёй апостольской навщівы в Польщі і Мадярьску.

„Вшыткы реферуючі згодли ся в тім, же навщіва Йоана Павла ІІ. перед тридцятёма роками в Маріяповчі была великым імпулзом про восточны католицькы церькви того реґіону, котры по довгім періодї комуністічной перзекуції, зачали ся слободно розвивати.

Передовшыткым про ґрекокатолилів, котры голосять ся ку сполочній дїдовизны Ужгородьской унії, і котры были притомны на тій події, была навщіва перед тридцятёма роками початком їх новой і інтензівной сполупраці,“ пише ся в інформації TSKE.

„Мукачовску єпархію як матїрь вшыткых ґрекокатолицькых єпархій під Карпатами, на котрой теріторії слызыла векшына чудотворных ікон, заступав владыка Ніл Лущак, їй апостольскый адміністратор,“ інформує Кошыцька єпархія. За Ґрекокатолицьку церьков на Словакії быв участный владыка Йоан Бабяк, пряшівскый архієпіскоп і метрополіта, котрый мав на конференції свій реферат, як і кошыцькый єпарха архієпіскоп Кіріл Василь.

В рамках споминовой події помолили ся і вечурню, почас котрой до базилікы в Маріяповчі уложыли мощі блаженого єромученика Теодора Ромжы і блаженого єромученика Павла Петра Ґойдіча. На вечурнї проповідав архієпіскоп Кіріл Василь.

Петро МЕДВІДЬ, Лем.фм. Ґрафічна і языкова управа: ред. АРК в СР.