25. 9. 2019: Лемківска Творча Осін для Павловича

Каждого рока в жолтни/октобрі Стоваришыня Лемків, як головный орґанізатор, кличе любителів русиньской творчости на Лемківску Творчу Осін. Тогорічна едиция подіі буде ріжнила ся дакус од тых орґанізуваных по інчы рокы. З нагоды 200. річниці народжыня Александра Павловича Лемківска Творча Осін, яка одбуде ся в днях 5.- 6. жолтня/октобра 2019 р., буде присвячена як раз памяти Будителя. Упамятніня і выступы запрошеных гости проходити будут в Ґорлицях і Біловежы.

 

Першый ден в Рускій Бурсі

XXVII Лемківска Творча Осін в першый ден проходила буде в просторах Руской Бурсы в Ґорлицях. То зміна в порівнаню до попередніх років, коли першый ден все проходил в єдній з місцевости на Лемковині, з котром повязана была дана річниця, найчастійше присвячена памяти выдатных особистости.

Стріча в Ґорлицях зачне ся о 15.00 год. звиджаньом Ізбы Памяти Івана Русенка, котра містит ся на першым поверсі Руской Бурсы. Проґрамову част отворят доповіди др габ. Олены Дуць-Файфер і Петра Мурянкы до темы 200 років од народжыня Будителя Павловича. По них за головный стіл засядут запрошены творці з Польщы, Словациі і Украіны. Будут представяляти свою авторску творчіст. На Осени вызвучат і творы Павловича.

Ґорлицку част подіі прикрасят выступы наймолодшой ґрупы ансамблю Руской Бурсы Терочка – Міні-Терочка, співачка Наталька Криничанка, гіст з Украіны і солисты Народного Ансамблю Біловежанка зо Словациі.

 

Шаришскє Чорне, Свидник, Біловежа

Другій ден тогорічной Лемківской Творчой Осени буде в цілости орґанізуваный на Пряшівскій Руси. То так само зміна в порівнаню до інчых років. З огляду на річницю Павловича Осін буде проходила в місцях, з котрыма звязаный был Будитель. Там тіж Лемкы підут го упамятнити.

Дополудня делеґация з Лемковины вєдно з ансамбльом Терочка подаст ся до трьох місцевости, з котрыма звязана была жытьова дорога Будителя. Найперше підут поклонити ся до села Шаришскє Чорне, в котрым 19. вересня/септембра 1819 р. пришол на світ. Положат квітя перед пропамятном таблицьом при місцевій школі. Другым пунктом упамятнінь буде Свидник. Гын Александер Павлович прожывал близко 37 років, будучы грекокатолицкым парохом. Його грoбниця находит ся під муром на східнім краю свидницкой церкви, напротив престола. В місті делеґация так само поклонит ся перед памятником Павловича, якій находит ся при тамтышнім Культурным Домі.

Посліднім пунктом Лемківской Творчой Осени буде Біловежа, русиньскє село на схід од Бардийова, де через 13 років, перед свидницкым періодом, Павлович вюл душпастырску послугу. Близко 13.00 год. делеґация зложыт квітя під пропамятном таблицьом при місцевій церкви св. Mихала.

О 14.00 год. в просторах біловежского Культурного Дому зачне ся ґальовый концерт присвяченый 200. річници народжыня Александра Павловича. Выступлят місцевый ансамбль Біловежанка, Терочка з Лемковины, як тіж дальшы колективы і індивідуальны выконавці, котры в тот ден придут прикрасити ювілей нашого Будителя.

Подія реалізувана є завдякы дотациі Міністерства Внутрішніх Справ Польской Республикы. Медияльный патронат тримают лемківскій часопис Бесіда, НН ІнфоРусин, часопис Русинів Словациі, і медияльна ґрупа ЛЕМ.фм +.

Севериян КОСОВСКIЙ, ЛЕМ.фм

(Публікуєме в оріґіналї – лемківскім варіантї русиньского языка.)