25. 8. 2023: Гелена ҐІЦОВА-МІЦОВЧІНОВА: І співам, і плачу (5. часть з припралёваной книжкы з таков самов назвов)

Гелена Ґіцова-Міцовчінова

І співам, і плачу (5.)

Сохраняй нас, Боже,

од лихой напасти,

жебы з крутой горы

не дрылила

до пропасти.

Мудры слова повім:

треба ся молити,

нещастя од себе

на бік оддрылити.

***

Чом же мати

про дїтину

з болю плаче?

Бо в родинї

цїлы рокы

жывот

все болячій.

***

Думаш ты, недуго,

же ты целебріта,

ходиш ку матери

сонцём не загріта.

Хоць єї і стріберный

нашыйник надїєш,

але материньске

сердце зледяніє.

А я хочу жыти

жытя малёване,

выпряч свої чачка

далеко од мене.

***

Щіпаш ты, грызуча,

спереду і зозаду,

же я на колїна

зо жалю упаду.

Міцно ся потримам

лїсковой паліцї,

з чім ся підперають

убогы удовіцї.

Я Сына Божого

милым словом хвалю,

одпряч ся далеко

од мене окалю.

***

Коли ся увиджу

в тяжкій чорній хмарї,

тай стріберна слыза

заблискать на твари.

Тоды зрывам квітку

у попій керти,

горячі квапочкы

з хусточков стерти.

Стуленыма руками

біжу ся молити,

з жывотворной былькы

соку ся напити.

Тогды коло уха

в серденьку залускать

і погласкать

росцвита

тернёва голузка.

***

Не жыю на світї

без болячой раны,

але хтось поставить

все захранны браны.

Хтоже мене міцно

преміцно заставать,

же на плотї виє

вітязна застава.

Хтоже творить такы

чудотворны дива,

же з ледяной кригы

на руках піднимать.

Хоче до жывота

добры рады дати

жебы-м ші дїтятку

могла заспівати.