25. 8. 2021: Русины вже мають Брайлів алфавіт

На алфавітї про невидячіх робили творцёве почас послїднїх місяцїв

Як інформовало нашу редакцію Общество русиньской літературы (Rusyn Literature Society), быв створеный першый Брайлів алфавіт про русиньскый язый.

Головным творцьом є Гарріс Мовбрі, котрый за послідній рік став знамый як автор Брайловых алфавітів про меншыновы славяньскы языкы, як наприклад кашубскый або лужіцько-сербскый.

„Гарріс надвязав контакт з обществом на ярь того року по тім, як збачів роботу орґанізації і єй основателя Старіка Поллока. Наслїдовала понука сполупраці на проєктї про наш язык, котру сьме радо прияли,“ інформовало Общество русиньской літературы.

При створіню алфавіта помагали і членове общества, русиньскый редактор Томаш Калиніч і публіціста Мигаль Лыжечко.

„Памятаючі на то, же многы Русины на Словакії не хоснують кіріліцю, приспособили сьме новый Брайлів алфавіт і кіріліцї, і латиніцї.“

Творцёве думали на вшыткы варіанты русиньского языка в кірілічній і латиньскій подобі. Перепис до Брайлового писма є основаный на меджінародных штандардах, зато особы, котры вже овладають Брайлово писмо про даякый іншый язык, легко научать ся варіанту про русиньскый язык.

„Брайлово писмо є сістема чітаня про невидячых, заложена на дотыку. Складать ся з піднятых точок у мережках розміру 2×3. Кажда варіанта розміщіня точок у мережцї одповідать єдній букві (або пунктуачному знаку ці ціфрї). Суть розлічны варіанты Брайлового писма про запис анґліцького, російского, ґрецького, гебрейского і многых далшых великых языків світа. Але велё малых языків іщі не мать свої Брайловы сістемы. Тоту проблему єм ся снажыв вырїшыти за послїднї місяцї,“ інформує на сайтї Общества русиньской літературы Гарріс Мовбрі.

Мовбрі має надію, же в будучности увидиме статї, докінця і книгы публікованы за помочі той сістемы.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.

Script logo