25. 5. 2024: Афініта ку самодештрукції

Од такого флірту мож чекати лем самодештрукцію.

Уж лем слїпый може не відїти, же україньскы амбасадоры, котры дістануть свою діпломатічну місію у Сербії, мають в робочіх нотах записаны впливовы операції посеред Русинів Войводины. Векша біда є, же ся найдуть люде, котры їм тоты ноты помагають повнити.

То, же україньскы амбасадоры ся на русиньскых подїях обгавувють реґуларно, як кебы ся старали о „своє“, не є жаднов новотов. А уж сьме чітали і о тім, яка щіра є україньска амбасада, кедь ішла фінанчно підтримовати деякы русиньскы проєкты у Сербії.

Од каждой єдной державы, в котрій Русины жыють як автохтонне населїня, бы єм то прияв як сімбол, же амбасадї не іде в Сербії лем о „свою“ меншыну, значіть меншыну, котра в державі, яку представлює амбасадор, є майорітным народом, але же хоче помочі і Русинам, котры жадну іншу такзвану властну державу не мають.

Кедь іде о Україну і їй амбасадора, пак не мож чітати з тых кроків ніч інше, лем впливову операцію. Што інше як впливова операція бы то мало быти, кедь бісїдуєме о країнї, котра нелем доднесь не узнала Русинів, корїнный народ Підкарпатьской Руси, ани лем за народностну меншыну, сперать Русинам їх основны народностны права, „контролює“ русиньскых актівістів, і то нелем на своїй теріторії, а в Новім Садї і цїлій Войводинї буде україньскый амбасадор найвекшый приятель Русинів?

Покля чоловіку быв подарованый Всевышнїм холем основный інтелект, котрый му дозволить такы основны мозґовы операції як рахованя до десять, пак му мусить быти ясне, же україньскый амбасадор під камуфлажов помочі лем здобывать вплив, котрый має служыти на тиху українізацію Русинів.

Тоту політіку сьме розкрыли вже давно, а знаме і то, же части русиньскых інтелектуалів у Войводинї, проукраїньского напряму, то нелем не перешкаджать, але докінця пасує до їх світа. Што є новотов, то вість, же теперь уж нелем україньска амбасада іде „спасати“ Русинів, але же русиньска інштітуція іде помагати Українцям будовати їх інштітуції.

Нїт, не є то сюжет абсурдной драмы, але інтерпретація вісти, котра ся появила на сайтї аґентуры Рутенпрес. Як сьме ся дочітали, україньскый амбасадор у Сербії, Володимір Толкач, навщівив Новинарьско-выдавательску інштітуцію Руске слово в Новім Саді, де бісідовав о тім, же на Універзіті в Новім Саді хотять одкрыти україньскый центер.

Но і директор Руского слова повів, же інштітуція, котру веде, залучіть ся актівно до планів на одкрытя такого центру. Вірю, же директор, Борис Варґа, бісїдовав за себе. Бісїдовати за цїлу інштітуцію бы было серёзно абсурдным.

Было бы абсурдным, же русиньска професіонална інштітуція у Войводині іде помагати одкрывати україньскый центер на універзіті, кедь Русины на Підкарпатю рокы жадають в Ужгороді одкрыти катедру русиністікы, а в тім лїпшім припадї суть лем іґнорованы.

Было бы то абсурдным і зато, бо Русины в Новім Садї мають властну русиністіку, котру в першім шорї бы мали професіоналны інштітуції підтримовати, а не іщі помагати центру, котрый є знова лем впливовов операціёв, яка в нашім припадї має в мерьку і нас, а то не зато, жебы сьме проквітали, але жебы нас українізовати.

А было бы то абсурдным і зато, бо кедь Українї так барз залежыть на Русинах, пак бы єм на стрічах з амбасадором з поції шефа Руского слова бісідовав о тім, коли планують дати нам нашы права на Україні, котру репрезентує, а не о тім, же за ваше болото мы вам золото. Просто, было бы абсурдным помагати україньскому амбасадорови повнити робочі ноты.

Найсмутнїше на тім є, же од такого фліртованя з україньсков діпломаціёв мож

скорїше або пізнїше чекати лем самодештрукцію.

Не знам, де ся в Новім Садї взяла тота афініта ку самодештрукції, но щіро ня то мерзить. Бо нам, Русинам у Карпатах, на роздїл од Кієва, на вас, войводиньскых Русинах, досправды залежыть.

Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК в СР.

Фото: Pexels.com.