25. 5. 2024: «Карпатска Русь» – дальшы здіґітализуваны номеры ґазеты

Як інформує америцкій Лемко-Союз (Lemko Association), єдна з нашых найстрашых еміґрацийных, реактивуваных орґанізаций, в посліднім часі до діґітальной базы ґазеты «Карпатска Русь» долучыли дальшы номеры.

«Хотіли бы сме подякувати Денісови Кімідж за пересланя 96 примірників Карпатской Руси, якы дотля не были здіґітализуваны» – інформує в короткым комунікаті Лемко-Союз.

Чысла ґазеты, якы были доданы до базы, своім обзягом обнимают рокы 1971-2002. Прото тіж част з них то номеры, якы вказували ся уж по анґлицкы. Старшы чысла «Карпатской Руси» печатали ся выключно по русиньскы.

Перед доданьом дальшых 96 номерів, в діґітальній базі «Карпатской Руси» находили ся 2233 примірникы. Одтепер тото чысло ся збільшыло і є про каждого в свобідным приступі..

Окрем «Карпатской Руси», на реченым сайті доступны сут архівальны выданя інчой еміґрантской ґазеты – «Лемко».

Фактично «Карпатска Русь» принимана єст як наступця ґазеты «Лемко» – вказувала ся од 1939 р. Од тамтой поры рахувала ся як періодик Лемко-Союза в ЗША і Канаді. Актуально «Карпатска Русь» выдавана єст по анґлицкы, як журнал через актуальны власти Лемко-Союза.

Через долгы рокы была неоціненом вартістю для Лемків в Старым Краю. Покріпляла в моментах тяжкых выпробувань, головно по 1947 р., коли населіня Лемковины нашло ся на землях выгнаня. «Карпатска Русь» дотерала до вельох нашых родин і доднес в декотрых з них находят ся єй архівальны примірникы.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)