25. 5. 2016: Выникать філм о пашованю за першой републікы. По русиньскы

Молодый штудент Універзіты Томаша Батю в Злінї Іво Репчік, котрого корїня сягать до Лабірьской долины, наточів у селї Габура в окресї Міджілабірцї часть філму Пашованый товар. Тему, як говорить, має в голові вже од часів, коли слухав повіданя о пашованю почас першой Чехословацькой републікы од стрыка і тетох на выходї Словакії. Інформацію принесла словацька державна пресова аґентура TASR.

Подля слов Репчіка за Першой чехословацькой републікы пашовали жены, хлопы і дїти без різдїлу віку. „Быв то властно вымінный бізніс з товаром, котрый в даній области не было дістати,“ повів молодый філмарь з тым, же почас тых пашовань через граніцї выникло много страшных і гуморных історій.

Інтересный способ філмованя

Репчік говорить, же філм буде образово інтересный тым, же є точеный камераманом Філіпом Кноллом, котрый вказує вольность свого професійного рукопису і свій властный погляд на даный реґіон.

Із технічного боку є філм інтересный тым, же часто хоснує ся погляд головного героя, такзваный Point od View. Значіть у філмы будуть образы, котры буде мож публіка відїти якбы зо свого погляду – якбы была сама головноым героём філму. Тота метода має подля слов Репчіка „погласкати“ автентічность тутешньёго погляду людей.

Твір є прімарно выдуманый на основі звуковой драматурґії. В многых моментах якраз звук пояснює позерателёви сітуацію або роскрывать чутя акторів.

Філм по русиньскы грають Габурчане

Пашованый товар буде лем чісто в русиньскім языку. „Тот язык є красный. Стрічам ся з ним од маленька і прийде мі природным про тамтешнє оточіня,“ повів про аґентуру TASR Репчік. Габуру, в котрій ся філмоваало, хотїв подля своїх слов, захопити в іщі непоскверненім штадію, кідьже сам видить, же русиньскый язык ся в многых селах помалы вытрачать. Хоць часть філму, котра ся робила в Габурї, є вже зроблена, філмарї ся до нёй вернуть іщі восени.

Жытелї Габуры ся до натачаня філму актвіно залучіли. Грають головны і меншы ролї. Обсадив їх там Репчік. „Іде о аматерів, котры ня барз приємно несподївали своёв валушностёв односно тых дїл. Обсадив єм їх з тугов по досягнутю автентічности резултату і русиньской бісїды,“ додав молодый філмарь.

П. М.

Script logo