25. 2. 2020: На русиньскім балї передали Орден Адолфа Добряньского

  • • Орден Адолфа Добряньского 4-ой класы быв запожычаный Аннї Кузмяковій.

    • Орден Адолфа Добряньского 4-ой класы быв запожычаный Аннї Кузмяковій.

  • •  Oрден Адолфа Добряньского 5-ой класы быв запожычаный Боґданови Ґамбалёви.

    • Oрден Адолфа Добряньского 5-ой класы быв запожычаный Боґданови Ґамбалёви.

В суботу, 22-го фебруара 2020-го року, в кошыцькім готелї Double Tree by Hilton проходив ІІ. Репрезентачный бал Русинів, котрого головным орґанізатором є молодежна орґанізація молоды.Русины. Гостителями на балї были Петро Штефаняк, Маріянна Железна і Петро Мацко.

Цїлём той події, котра по першім річнику в Пряшові перенесла ся до Кошыць, є вытворити простор на сполоченьску стрїчу Русинів на репрезентачній уровни.

На бал пришли і вызнамны гостї

ІІ. Репрезентачный бал Русинів святочно одкрыв міністер фінанцій Словацькой републікы Ладіслав Каменіцькый, котрый участным прозрадив, же сам має жену Русинку. Участныма на події были і уповномоченый влады Словацькой републікы про народностны меншыны Ласло Буковскый ці державный секретарь Міністерства обраны Словацькой републікы Марцел Салонь.

Русинів на бал пришли посмотрити і двоми єпіскопи. Владыка Мілан Хаутур, єпарха Кошыцькой ґрекокатолицькой єпархії в рамках одкрытя балу поздравив участных і заспівав многолітствіє. Вєдно з ним пришов і апостольскый адміністратор Кошыцькой ґрекокатолицькой єпархії владыка Кіріл Василь.

Богатый проґрам і передаваня ордену

Орґанізаторы приготовили на баловый вечур богатый проґрам. До танця грала Музика Мілана Рендоша – Рендошовці і ґрупа Ролланд з Чірча. В рамках проґраму выступив і популарный співак русиньскых співанок Штефан Штець, участным одпрезентовав ся і Фолклорный колектів Горнад з Кошыць. Цїлым вечором проводив в позіції модератора Михал Ільканин.

В суботу в рамках балу проходило і історічно перше передаваня Ордену Адолфа Добряньского. Орден зрядив на своїм остатнїм засїданю Округлый стіл Русинів Словеньска. Удїлює ся фізічным і правницькым особам, котры заслужыли ся о розвиток народной ідентіты, обгаёбу прав Русинів выходячіх з меджінародных документів і підниманя якости жывота Русинів на Словакії і в загранічу. Новозрядженый орден має пять клас і єдну окрему класу з коланом (ланцом ордену). ОСРС так хоче оцїнёвати заслугы на благо Русинів.

В Кошіцях Орден Адолфа Добряньского 4-ой класы быв запожычаный Аннї Кузмяковій за вызначный вклад до области розвитку русиньской пресы і културы, Орден Адолфа Добряньского 5-ой класы быв запожычаный Боґданови Ґамбалёви за вызначный вклад до области русиньскых медій. Церемонію запожычаня проводив Мілан Піліп, канцеларь ордену і Петро Штефаняк, председа Округлого стола Русинів Словеньска.

Додаточно буде Орден Адолфа Добряньского 4-ой класы запожычаный Василёви Ябурови, котрый не міг взяти участь на балї. Ябур має дістати нагороду за вызначный вклад до области розвитку русиньского языка.

Петро МЕДВІДЬ, ЛЕМ.фм

Script logo