25. 11. 2022: З приправлёваной книжкы Гелены ҐІЦОВОЙ-МІЦОВЧІНОВОЙ – І співам, і плачу

Гелена Ґіцова-Міцовчінова

 

І співам, і плачу (Стихы)

 

Хоць дні материньскы

не легкы а терьпкы

свій спокій находить

при распятю в церькви.

 

В тихоті Спасителя

мати терпезлива

там і Дух Святый

радість порозливать.

 

Біль у серці несеш

не лем ты єдина

же дітя безбранне

то не ваша вина.

 

Нихто не розділить

никому з болести

а благодать Божу

выпросиш при кресті.

 

***
Жалі мої жалі

як сте ня зуяли

не з єдного боку

але з каждой страны.

 

І співам і плачу

тішу ся як можу

а свому серденьку

помочі не можу.

 

Хоць бы єм співала

цілы дні і ночі

і так будуть мої

заплаканы очі.

 

***

Дозволь любый Боже

кажде рано

з молитвов

новый день витати.

 

Без болести

дражков благодати

з дітинов крачати.

 

Хоць в сердці жаль

в душі пропасть глубока

а перед  матірьов

дражочка шырока.

 

Зошли Отче з неба

хоць квапку

з твойой благодати

яку выпрошує

нещаслива мати.

 

***
Не знаш любоване

чом ікона на стіні?

Бо в очах твойой мамкы

все лем хмары сині.

 

Хоць чекам коли ясне

сонечко засвітить

 і так николи не буде                                

уж щастя на світі.

 

***
Тішу ся як дітя

з першой ярьной квіткы

з якой тобі сыне

пишу приповідкы.

 

Дозволь Боже в церькви

співати Осана

бо моя співанка

є недоспівана.

 

А Ты Сыне Божый

роспятый на кресті

помож уж без скорби

тяжкый тягарь нести.

 

З дітинов на драгу

рано выкрочіти

а пропасть глубоку

лем перекрочіти.

 

Все із руженчіка

віночок увити

милосердного Отця

молитвов славити.