25. 10. 2018: Вігорлатьскій музей у рамках святковань сторічніцї о Добряньскім

Вігорлатьскый музей у Гуменнім із нагоды сторічніцї выникнутя Чехословакії приготовив на днї од 25-го до 28-го октобра 2018-го року продовжіня споминовых подій присвяченых Адолфови Добряньскому.

Штириднёвый сполоченьско-културный проґрам під назвов Одказ Адолфа Івановіча Добряньского про сучасность робить музей в сполупрацу і з партнерьскыма орґанізаціями в Левочі, Гуменнім, Михалівцях і Рудлёві.

 

Лекції на школах і стрїча в Рудлёві

В рамках події 25-го октобра із жывотом Добряньского познакомлять ся штуденты почас блоків лекцій і святочной академії на Ґімназії Янка Францісціго-Рімавского в Левочі і о день пізнїше, 26-го октобра, на Ґімназії армадного ґенерела Людвіка Свободы в Гуменнім.

В суботу, 27-го октобра, одбуде ся публічна пєтна стрїча в роднім селї Добрянсьского – в Рудлёві, де буде проходити проґрам коло памятника. В недїлю святкованя перенесуть ся до Михаловаць, де одбуде ся Божественна літурґія в Православнім катедралнім соборі св. Кіріла і Мефодія і наслїдно ся піде ку памятнику Добряньского, котрый ся в містї находить.

 

В недїлю і конференція

Якраз в неділю, 28-го октобра, одбуде в просторах Вігорлатьского музею в Гуменнім і научна конференція зо святочнов акдеміёв. В рамках конференції выступить пять реферуючіх.

Подія штириднёвых святковань одбуде ся під покровительством председы Матіцї словацькой Маріана Ґешпера і председы Пряшівского самосправного краю Мілана Маєрьского. Подія была з публічных жрідел підпорена Фондом на підпору уменя, з розрахунку Пряшівского самосправного краю і Матіцёв словацьков.

Петро МЕДВІДЬ, лем.ф,