24. 9. 2018: Русиньскій словник для мудрых (телефонів)

В часі, коли буде проходил культурний фестіваль «Коли голубиця летіла», орґанізуваний Дружством Руснак в Хорвациі, одбуде ся і засіданя Світового Форуму Русиньской Молодежы. Товды же, в суботу 29. вересня/септембра 2018 р., буде мала премєру мобільна словникова аплікация.

Аплікация «Рускій словник» то проєкт зрыхтуваний двома студентами, членами Дружства Руснак. Івона Гнатко, студентка прeдшкільного і вчасношкільного вчыня Університету в Загребі, награла голос, придумала і зробила ґрафічний проєкт і ілюстрациі, а Матвій Шторґа, студент інформатикы на Університеті в Загребі, занял ся проґрамуваньом аплікациі. Ідею сотворити таку аплікацию дала професор росийского языка Елена Будовска з Америкы (Georgetown University, Washington), коли в липци/юлию 2017 рока, по закінчыню 14. Світового Конґресу Русинів в Осієку, зберала лексикальны материялы посеред бачваньскых Руснаків.

Аплікация «Рускій словник» на днес рахує 170 слів приділеных до поєдных катеґорий. Попри словах, єст і коротка презентация о розвитку русиньского языка, в однесіню до його бачваньского стандарду (а при тым і другых вариянтів), а окрем того і мап розселіня Русинів в цілым світі.

Як пише спілавторка проєкту, Івона Гнатко, тота аплікация

допоможе пошырити знаня о Руснаках як нациі без материньской державы, допоможе піднести нацийоналну свідоміст Русинів і кільо-тільо сохранит од збытя сес мікроязык і найстарший кодифікуваний вариянт языка бачваньско-сремскых Руснаків. При схоснуваню сучасной технолоґіі мож думати над пошырюваньом і популяризацийом проєкту, котра може быти доступна каждому безплатно. Авторы рахуют на тото, што проєкт принесе хосен дітям, котры не мали нагоды чути і вчыти ся русиньского языка , а тота аплікация бізовно поможе і школярям на лекциях русиньского языка і культуры в хорватскых школах. Тепер науку русиньского языка веде ся в школах в Петровцях, Старых Янковцях, Вуковарі і Міклошевцях.

Од ідеі, як выникнула по конґресі в Осієку, до зробліня чого-небуд – далека дорога, зато треба єй было взяти в рукы і піпхнути дальше. Як бесідує для порталю lem.fm Івона Гнатко – Тішу ся, же можеме дашто зробити не смотрячы на тото, же не было на оне фінансовой підпоры. Великом кількістю дни і годин тяжкой роботы успішно довели сме нашу ідею до того, же приде на хосен вшыткым. Тым єм горда.

Приступ ґу аплікациі вшыткы заінтересуваны будут мати од 29. вересня/септембра 2018 р.

Боґдан ҐАМБАЛЬ, жрідло: лем.фм