24. 7. 2018: Баєрівчане просят на фестіваль

В неділю, 29. липця/юлия 2018 р., зачне ся о год. 13.30 фестіваль в русиньскых Баєрівцях. То уж 23. едиция той культурной подіі, орґанізуваной рік в рік в тым підлюбовяньскым селі. Наголовок акциі то першы слова русиньского гымну «Я Русин был, єм і буду». Головном цілю фестівалю є пошырювати фольклор жытелів Баєрівец та другых близкых сел того реґіону Пряшівщыны.

Орґанізацийом фестівалю занимат ся Сельскій Уряд на челі зо старостом Михалом Секераком. Баєрівчане кажду слідуючу едицию акциі збогачают новыма сценічныма выступлінями. Тогорічній фестіваль принесе концерты так колективів, як і солистів. Презентуваний буде – згідно з традицийом – фольклор західньой части Пряшівской Руси, предовшыткым обшыри сабиновского та старолюбовяньского окресів. В сценічным проґрамі слідувати будут м.ін. домашні Баєрівчане, Сестры Угляровы ци ґрупы з недалекых сел – Поляна з Орябины та Чаварґошы з Сабинова. Сольову співанку представляла буде м.ін. дама русиньской естрады Анка Порячова з родином.

23. річник свята то тіж додатковы акциі. Ден перше, в суботу, 28. липця/юлия, в сали Культурного Дому вказуваний буде документальний фільм про основаня І Чехословацкой Республикы. В хападлах великодержав. Битва підкарпатьскых Русинів о місце в родині европскых народів то річницьовий фільм, автором котрого є председа ОСРС, Ян Липиньскій. Товаришучыма акциями будут тіж выстава образів деревяных церкви та промоция другой части книжкы про Баєрівці «Гірскє село ІІ.».

Подія фінансувана є з Фонду на підпору культуры народностных меншын Словацкой Республикы.

Севериян КОСОВСКЫЙ, фот. bajerovce.sk

(Публікуємє в оріґіналї – лемківскім варіантзї русиньского языка.)

Script logo