24. 6. 2021: Школярї підуть стежками русиньскых предків

Русиньска оброда на Словеньску – Містна орґанізація РОС в Меджілабірцях на тот рік приготовила проєкт про школярїв основных школ в Меджілабірцях, котры ся вчать русиньскый язык під назвов Стежками русиньскых предків.

Орґанізація такым способом хоче школярям приближыти русиньску історію і приготовити їм інтересный проґрам, котрый збогатить їх навчаня.

Уж тоту пятніцю, 25-го юна 2021-го року, є приготовлене перше із путовань школярїв, котры підуть за історіёв предків села Чертіжне. Участны навщівлять памятну русиньску ізбу, де будуть мати історічну лекцію, посмотрять ся на цінтерь, де суть похоронены вызначны русиньскы діятелї Адолф і Віктор Добряньскы ці Юлій Ставровскый-Попрадов. Так само посмотрять собі і містный ґрекокатолицькый храм, а приготовлены суть про них і короткы забавно-едукачны актівности в русиньскім языку.

На септембер ся приготовлює путованя за історіёв князя Лабірця до Габуры, де дїти навщівлять памятник князя, але і православный деревяный храм. З русиньсков писательков Меланійов Германовов будуть бісїдовати о історії Русинів а на містнім гріску їх будуть чекати і шпортовы актівности.

В октобрї бы мали іти до Сниньского окресу за історіёв сел Тополя і Осадне. В родиску Александра Духновіча оддають честь будителёви коло ёго памятника і будуть їм вказаны ремеселны выробкы. В Осаднім підуть посмотрити до кріпты вояків з 1-ой і 2-ой світовой войны, а драгов назад посмотрять собі і деревяный храм в Уліч-Кривім.

Русинська оброда на Словеньску орґанізує проєкт Стежками русиньскых предків вдяка підпорї з Фонду на підпору културы народностных меншын.

Петро МЕДВІДЬ, ЛЕМ.фм, ґрафічна і языкова управа: ред. АРК в СР, жрідло фотоґрафії: Wikipedia.

Script logo