24. 6. 2021: Папа Франціск призначів нового кошіцького єпарху

Як інформовав Пресовый центер Кошіцькой єпархії, Папа римскый Франціск прияв дня 24-го юна 2021-го року зречіня ся пастырьского ряджіня Кошіцькой ґрекокатолицькой єпархії передложене владыком Міланом Хаутуром, і єдночасно призначів за кошіцького єпарху владыку Кіріла Василя.

Архієіскоп Кіріл быв дотеперь апостольскый адміністратор єпархії sede plena Кошіцькой єпархії.

„Призначіня єпрхіалного єпіскопа є проявом старостливости Святішого Отця о окремы партікуларны церькви і ёго намагы забезпечіти Божому народу безпечне веджіня ку спасі,“ пише ся в інформації, котру подала Кошіцька єпархія.

Владыкови Кірілови зіставать особный тітул архієпіскоп. Лем 21-го юна быв Папом рисмскым призначеный за члена Верьховного трібуналу Апостольской сіґнатуры у Ватіканї. Апостольскым адміністратором sede plena быв владыка Кіріл од 20-го януара 2020-го року.

Архієпіскоп Кіріл

Новый кошiцькый єпарха Кіріл Василь народив ся 10-го апріля 1965-го року в Кошiцях. Ёго отець быв ґрекокатолицькым священиком. Богословскы штудії закінчів на Римокатольцкій кірілометодійскій богословскій факултї Універзіты Коменьского в Братіславі у 1987-ім роцї. В тім часї ґрекокатолицькы богослові штудовали на римокатолицькій факултї, бо властну семінарію ґрекокатолици не могли мати.

По закінчіню штудій быв крижевацькым єпархом Славоміром Мікловшом рукоположеный на священика Пряшівской ґрекокатолицькой єпархії. Єпархія втогды не мала свого єпіскопа, вів єй ордінарій Йоан Гірка, пізнїшый єпарха.

В авґустї 1987-го року, з поволїнём ордінарія, еміґровав до Італії і зачав штудіюм на Правницькій факултї Папского восточного інштітуту в Римі. В децембрї 1989-го року здобыв ліценціат канонічного права і зачав штудовати приправный рік ку докторату. В октобрї 1990-го року штудії перервав і наступив до новіціату Товариства Ісусового (єзуіты) у Дженові.

По навернутю до Рима у 1992-ім роцї продовжовав у штудіях і в децембрї 1994-го року здобыв докторат канонічного права на Правницькій факултї Папского восточного інштітуту в Римі. У 2002-ім роцї быв на тій школї выбратый за декана, проректора і в маї 2007-го року быв выменованый за ректора.

Од мая 2009-го року быв секретарём Конґреґації про восточны церькви. Втогды быв і призначеный за архієпіскопа, єпіскопске рукоположіня прияв в юни од крижевацького єпіскопа Славоміра Мікловша, пряшівского архієпскопа метрополіты Йоана Бабяка і кошыцького єпархы Мілана Хаутура. Є автором многых публікацій і довгы року сполупрацує з Radio Vaticana.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.