24. 5. 2020: Тріпартіта: Взникне комісія, котра мать рїшати зміны у пензіях і данёвій сістемі

Представителї заместнанцїв і замнетнавателїв 20. мая 2020 у Братїславі договорили ся з владов, же взникне комісія, котра буде рїшати зміны у пензійній сістемі і сферї данёво-одводового затяжіня. Крокы той комісії мають помочі злїпшыти фунґованя тых сфер, як і помочі наштартовати економіку. Інформовав о тім по скінчіню першого засїданя Господарьской і соціалной рады СР міністер роботы Мілан Крайняк (Sme rodina).

Тріпартіта ся договорила на тім, же крокы на злїпшіня подникательского середовиска з дїлнї резорту господарства ся проїднають і зо соціалныма партнерами. Єднако буде рїшати і зміны в Законнику роботы. „Діскусія была конштруктівна, наперек тому, же свої погляды сьме высловлёвати  барз одкрыто. Вірю, же до будучности будеме знати наставити сістему так, жебы сьме все доказали прийти і з даякыма выслїдками, абы то не была лем бесїда,‟ сконштатовав Крайняк.

Соціалны партнеры ся на їднаню занимали главно наставлїнём економічной і соціалной сістемы, їднали і о економічных кроках в часї коронавірусу. „Почас крізы приправиме в штонайкоротшім часї пропозіцію на продовжіня змлув, котры были прияты на добу урчіту, жебы їх мож было продовжыти, чім можеме затля захранити 400 робочіх місць, главно в автомобіловім промыслї. Кедь бы не было уможливлене їх продовжіня, правдоподобно бы дакотры заместнавателї мусили рїшати вопрос непродовжованя в такім робочо-правнім одношіню,‟ пояснив Крайняк.

Премєр Іґор Матовіч (OĽaNO) обернув увагу на то, же Словакію чекать найвекша економічна кріза за послїднї десятьроча. „Праві тот тяжкый період крізы, котрый перед нами стоїть, пережыєме з найменшыма ранами втогды, кедь будеме тримати вєдно. І заместнавателї, і заместнанцї, і влада,‟ підкреслив премєр з тым, же то поважує за важну задачу влады в рамках тріпартіты. „Потїшыло бы ня то, кебы сьме собі усвідомили, же найлїпшов збранёв , як людём звышыти платы, є знижыти незаместнаность на што найнижшу можну уровень. Потїшыло бы ня то, кебы то быв наш сполочный цїль до будучности і жебы сьме глядали дорогы, як штонайшвыдше наштартовати заместнаность, жебы люде роботу мали, і такым способом їм забезпечіме лїпшый і спокійнїшый жывот,‟ додав Матовіч.

Медіялный сервіс Уряду влады СР, до словацького языка перетлумачів: А. З.