24. 5. 2016: Енді Варгол у Лоджі

Атлaс уменя, велёраз узнана як найлїша ґалерія в Польщі, уж 13 років явить ся важным културным місцём на мапі Лоджі. За тоты рокы ту выставляли ся творы славных світовых умелцїв, такы як Дейвід Линч, Роман Опалка. Минулого року были выставляны ту образы Юрия Новосільского.

До 5. юнія 2016 мож відїти в ґалерії Атлас уменя тыж творы найвызначнїшого і найвеце знамого во світї умелця русиньского походжіня – Ендія Варгола. Окрем робот краля поп-арту, выставлены суть там і роботы Жан-Мішел Бакія, Франка Стелі, Монікы Бонвічіні, Дана Флавіна ці Стіва Макквіна.

Выставка є пріватном колекціов Ерікы Гофман-Кеніґе, котра першый раз рїшыла вказати ю за граніцями Нїмецька. До того часу лем раз указовала єй мімо свого берліньского місця бываня – перед семома роками в Дрезденї. Назва выставы Ерікы Гофман-Кеніге то: «Мій выбір для Атляса Штукы з Колекциі Гофман». Збірка выбраных творів сучасного уменя представлена є простым способом – запрезентованый є лем назва і автор твору. Подля слов амбасадора Нїмецька, Ролфа Нікела, якый дав коментарь ку выставцї – слова в уменю не суть потрібны. Подля амбасадора, уменя за помочі фарбы, текстуры, запаху, свого обсягу, впливать на простор, в якім є умістнене, через іншы творы, з котрыма в рамках експозіції входить в інтеракцію, а тыж через скушености адресатів, якы го принимають.

Тото, як впливать Варгол і іншы умелцї сучасного уменя, мож перевірити в ґалерії „Атляс Штукы‟ в Лоджі (ул. Пётрковска 114/116).

Наталія МАЛЕЦЬКА-НОВАК, фотка: Домінік Швемберґ, atlassztuki.pl