24. 4. 2020: Буковскый: „Проґрамове выголошіня є добра основа. Треба думати і на русиньскый язык.‟

Проґрамове выголошіня влады в области прав і поставлїня народностных меншын є солідным штартовным пунктом до далшой роботы в тій сферї. Сучасный уповномоченый влады Словацькой републікы про народностны меншыны Ласло Буковскый оцїнив главно обовязок прияти комплексный закон о народностных меншынах, пише аґентура TASR.

„Барз позітівно оцїнюю крок посунути далше леґіслатівный замір, котрый наш уряд приготовив. Якраз посередництвом закона уможнюючого комплексно задефіновати і спростити існуючу леґіслатіву можеме згармонізовати права народностных меншын подля меджінародных пожадавок і очековань самых членів народностных меншын,“ цітовала Буковского (на фотцї) про TASR.

Аґентура далше інформує, же Буковскый ся в тім дїлї хоче стрїтити з міністерков справедливости Маріёв Коликовов. Міністерка бы як председаюча Раді влады Словацькой републікы про людьскы права, народностны меншыны і родову рівность мала леґіслатівный замір передложыти на їднаня владного кабінету.

В припадї роздумованя о розшырїню можности діяня закона о хоснованю языків народностных меншын на высшы теріторіалны цїлкы – значіть самосправны краї, Буковскый припоминать, жебы ся думало нелем на хоснованя языка мадярьской народноснтой меншыны, але і іншых меншыновых языків, наприклад русиньского на выходній Словакії.

„Єднако треба відїти і то, же на уровни высшых теріторіалных цїлків не мусить быти проценто конкретной народностной меншыны высоке, но в рамках краю існують окресы, де є їх чісло высоке,“ обернув увагу уповномоченый.

Петро МЕДВІДЬ, ЛЕМ.фм

Script logo