24. 4. 2020: Премєр: „Вывой пандемії і одкрываня економікы бы ся могло слїдовати.‟

Братїслава 24. апріля (TASR) – При приїманю кроків на поміч словацькій економіцї треба поступно контролёвати і оцїнёвати і їх уваджаня до практікы. Вывой пандемії нового коронавірусу і надвязуюче одкрываня економікы бы ся зась могло слїдовати нелам цїлословацькы, але і частково на уровни реґіонів і діференцовати так окремы фазы. І о тых темах діскутовав у пятніцю економічный крізовай штаб.

Кедь ся буде сітуація зле розвивати в конкретнім реґіонї, так там буде треба отваряня новых фірем загамовати або зволити сістем наспак, або  

заперти дакотры фірмы, жебы не терпіли реґіоны, де по медіціньскій сторінцї бой (з новым коронавірусом) звладати будуть, бо можно лїпше дотримують гіґіенічны правила і веце решпектують схвалены крокы. Абы не терпіли вшыткы про то, же даґде на Словакії є приступ беневолетнїшый,‟ повів на бріфінґу по засїданю премєр Іґор Матовіч (OLANO). „Тота причіна є на то, жебы сьме ся позерали на отваряня новых фірем з реґіоналного погляду, можно аж на уровни окресів, є барз інтересна. Я зато єм зведавый, як ся поставлять ку тому епідеміолоґове,‟ підкреслив председа влады.

І подля віцепремєра і міністра фінанцій Едуарда Геґера (OĽaNO) ся на стрїчі економічного крізового штабу говорило о тім, же з погляду дотримованя контролї над пандеміёв при одкрываню економікы СР буде важне позерати на реґіоналны крокы. „Так будеме мочі тестовати, яке є повязаня меджі отваранём, ожывлёванём малой словацькой економікы і єдночасно триманём вірусу під контролёв. Якбы ся дашто діяло, знаме омного швыдше модеровати цїлый вывой,‟ підкреслив Геґер.

"В принціпі сьме одкрыли тему, ці мать смысел плошный приступ одкрываня економікы, або го реґіонално діференцовати. Мы, як економы, сьме были зато, кедь є можность і з погляду здравотного, скорїше діференцовати,‟ зазначів бывшый віцеґубернатор Народной банкы Словакії (НБС) Ян Тот.

Подля віцеґубернатора НБС Людовіта Одора треба при приниманю кроків влады моніторовати ай їх реалізацію в парктіцї. „Єден погляд є адміністратівный, значіть до якой міры єствують перешкоды, котры знаме зліквідовати, жебы поміч могла быти швыдша і адреснїша. Другый погляд є наісто в тім, же мусиме моніторовати і тоты „білы місця на мапі‟, де є поміч іщі потрібна, значіть котры сеґменты економікы ю потребуюти навыше,‟ доповнив Одор. Третю ровина спочівать подля Одора в потребі моніторованя, хоць ай на тыжденній базї, на слїдованю, ці даны крокы приносять потребны выслїдкы. „А кедь нїт, так якым способом треба дашто змінити, жебы желаны ефекты были штонайлїпшы, але абы ся єдночасно не марновало з верейныма фінанціями,‟ доповнив Одор.  

Портал Уряду влады СР, перетлумачів зо словацького языка і доповнив фотоґрафію: А. З.

Script logo