24. 4. 2019: В Дебрецинї торжественно одкрыють і посвятять русиньскый дім
Од пятніцї, 26-го апріля 2019-го року, будуть мати ґрекокатолицькы Русины, котры жыють в Мадярьску своє „обыстя“. В тот день владыка Філіп (Кочіш), гайдудорожзкый архієпіскоп і метрополіта посвять Русиньскый ґрекокатолицькый центер, котрый збудовали в раёнї міста Дебрецин-Ёвжа.
На торжественнім одкрытю нового русиньского дому будуть брати участь представителї мадярьской державы і дебрециньской самосправы. Якраз держава выбудованя центру фінанцовала.
Простор про стрїчі
„Ту будеме годны ся стрїчати, бісїдовати і коордіновати свої дії в будучности,“ повіла Віра Ґіріц, представителька Русинів у мадярьскім парламентї нецілы два рокы перед тым, кедь ся в місяцї юл 2017-го року положыв фундамент – основный камінь центра, котрый буде в пятніцю посвяченый і торжественно одкрытый.
В приговорї почас події втогды Ріхард Тірчі, котрый заступав оддїлїня про народности Міністерства людськых жрідел Мадярьска, звернув увагу на тото, же „хоць Русины і не мають своюй державности, што є смутным про вшыткых, но мають свій дім ‒ Ґрекокатолицьку церьков.“
В Мадярьску ся в остатнїм списованю населїня приголосило 3882 людей ку русиньскій народности, з того 1777 ку Ґрекокатолицькій церькви.
На домі буде ерб і крест поблагословленый Папом римскым
Кінцём марца того року высокопреосвященый Філіп вєдно із Віров Ґіріц i Віктором Крамаренком – председом Вседержавного русиньского самосправованя в Мадярьску, брали участь на авдієнції у Папы римского Франціска.
Русиньска делґація взяла на авдієнцію з дерева вырїзаный русиньскый ерб і крест, котры мають быти на фасадї нового центра. Папа рисмкый Франціск почас авдієнції, котра проходила на Площі св. Петра, поблагословив тоты принесены предметы, о чім было зроблене з владыком Філіпом і інтервю мадярьскым высыланьом Radio Vaticana.
На одкрытю і представителї державы і міста
Як вже было спомянуте, выбудованя Русиньского ґрекокатолицького центрa фінанцовала мадярьска держава. Держава буде мати присутного представителя і на святочнім одкрытю, котре буде повязане з посвячінём новой будовы.
Русинів на події поздоровить Мікловш Шолтес, державный секретарь у вопросах реліґійных і націоналных звязків Канцеларії премєрміністра Мадярьска. За самосправу – місто Дебрецин, буде брати участь найвысшый представитель Саболч Комолої, котрый є пріматором (мером) Дебрецина. Участным ся приговорить і представителька русиньской меншыны в парламентї Мадярьска Віра Ґіріц.
Торжественным завершалным пунктом пятніцёвого проґраму буде споминане посвячіня, котре буде одправляти владыка Філіп. Подія є підпорена Міністерством людьскых жрідел і Канцеларіёв премєрміністра Мадярьска.
Петро МЕДВІДЬ, лем.фм
