24. 4. 2018: Русиньскы дїти 28. апріля i 26. мая перевірять свої знаня материньского русиньского языка

Як інформовала аґентура Рутенпрес, в суботу 21-го апріля 2018-го року на Основній школї Петра Кузмяка з русиньскым навчалным языком в Руськім Керестурї, в Сербії, проходило юбілейне 20-те Цїлорепублікове змаганя зо серьбского языка як нематериньского.

Цїлорепблікове змаганя в суботу одкрыла директора містной школы Гелена Пашо Павловіч, котра привітала госітїв із цїлково 35-ёх школ Войводины. У Войводинї діють і школы далшых народностных меншын, котры в тій области жыють і ведуть освіту у своїм материньскім языку.

Меджі 86-ма школярями были успішны і школярї русиньскых школ, як той домашнёй, так і школы в Коцурї. Найвекшы успіхы русиньскых школярів у міцній конкуренції здобыли Леонтій Сивч із Руського Крестура, Татяна Буіла і Даніела Горняк зо школы в Коцурї. Вшыткы здобыли другы місця у своїй катеґорії. На третїх місцях в єднакій катеґорії скінчіли Леон Юріч і Алексей Мудрі з керестурьской школы і Даріна Михняк з Коцура.

Меджі школярями семой класы на третїм місцї скінчіла Віолета Чіжмарь, так само з домашнёй школы, котра гостила змаганя.

По замаганях зо знань серьбского языка русиньскы школярї перевірять вже тоту суботу 28-го апріля і свої знаня з материньского языка в рамках Меджіокружного змаганя в русиньскім языку і в языковій културї. Тото змаганя буде проходити в Дюрдёві. Свої знаня вкажуть школярї од 5-ой по 8-му класу, котры вже перед тым успішно абсоловали школьскы змаганя, якы мали быти на основі рїшіня Міністерства освіты, наукы і технолоґічного розвитку Сербії реалізованы до кінця марца.

Змаганя з русиньского языка і з языковой културы буде мати так само своє цїлорепублікове коло. Тото перевірїня знань русиньскых школярїв одбуде ся так само в Дюрдёві і є наплановане на 26-го мая.

П. М., жрідло фотоґрафії: Рутенпрес