24. 10. 2021: Вышла книга о Ужгородї по русиньскы

Книжка в лїтї вышла і в україньскій верзії.

Як інформовав Юрій Шиповіч, 21-го октобра 2021-го року в Центрї култур народностных меншын Закарпатя в Ужгородї одбыла ся презентація книгы з назвов Унгвар – Ужгород. Муй рудный варош.

Автором публікації є знамый русиньскый історік і краєзнатель Людвіг Філіп, котрый є і честным председом Ужгородьского културно-освітнёго общества імени Александра Духновіча. Книга в юни того року вышла і в україньскій верзії. Як втогды автор повів про Tv21 Унгвар, на книжцї робив цїле своє жытя.

„Старав єм ся писати історію обєктівно. 47 років я робив у краєзнавчім музею як ведучій оддїлїня, як научный працовник, і мав єм прекрасну базу, было з чого взяти – документы, фотоґрафії,“ повів втогды Філіп.

На презентації русиньской верзії автор повів о тяжкій пути, котров перешла ёго теперь публікована дїтина. Так само спомянув, же публікація бы не дішла до чітеталя, кебы не было підпоры Бориса Жулканича з Ужгородьской націоналной універзіты. Лем ёго участь помогла книзї увідїти світ.

Модератором презентації быв Євген Жупан, голова Народной рады Русинів Закарпатя. На події брали участь і далшы русиньскы актівісты краю, меджі котрыма быв голова Закарпатьского областного общества імени Александра Духновіча Юрій Продан, голова Русиньского културолоґічного клубу Юрій Шиповіч, голова Ужгородьского културно-освітнёго общества імени Александра Духновіча Михаіл Белень і далшы.

Петро МЕДВІДЬ, Лем.фм. Ґрафічна і языкова управа: ред. АРК в СР. Фото: Віра Кобулей.