23. 9. 2024: Вернісаж выставы „Думкы” Андреї Клімо в Братїславі
Дня 19.9.2024 у T. O. P. AUTO PREMIUM Art Gallery в Браїславі у сполупраці з Turuk & Art Collective была отворена выстава „Думкы” вытварнічкы Андреї Клімо Прибітной.
Русинка по матери
Андреа Клімо Прибітна походить із села Стащін. Русиньскы корїня подїдила по матери. Ку своёму русиньскому походжіню ся выядрила так: „Ай кедь не знаю бісїдовати по русиньскы, знаю, же Русинка єм.”
В 2011 роцї закінчіла ґімназіялны штудії в Снинї а пак зачала навщівовати Факулту архітектуры і дізайну Словеньской технічной універзіты в Братїславі, де абсолвовала інжінїрьскы штудії архітектуры під веджінём доц. Мґр. Інґ. Арх. Андрея Ботека, ПгД. Од 2017 до 2018 ся здоконалёвала на годинах мальбы на Біблічній школї в Реддінґу в Каліфорнії під веджінём лекторкы Б.А. Терезы Дедмон. У 2024 роцї абсолвовала цертіфікованый курз ”Současné umění” з куратором Мілославом Ворлічком.
А. Клімо взяла участь у 14-ёх колектівных выстав (Словакія, США, Іспанія, Белґія), єдну 2-особову выставу (Росія) а мала і 4 самостатны выставы (Словеньско, Белґія). Выстава „Думкы” є єй пятов самостатнов выставов. Наша вытварнічка здобыла 3. місто в катеґорії професіоналный малярь олїй/акрил на змаганю Local Inspiration award 2023 в Тексасї (США).
Моментално жыє і творить у Празї. Венує ся переважно сучасній фіґуратівній мальбі, ілустрації, роботї з акрилом і олїём. Свої образы компонує у трёх ровинах, выужытём лінії, мальбы і штруктуры. Єй образы суть рефлексіёв внутрїшнїх почутїв, діялоґу і баданю ідентіт.
Куратором выставы быв Андрей Ботек
Вернісаж вступным словом одкрыв Іґор Турук із здружіня вытварників модерного уменя Turuk & Art Collective. По привітаню гостїв куратор выставы Андрей Ботек найперше передставив характер выставы, коли бісїдовав о одкрываню внутрїшнїх імпулзів авторкы, котры поштовхують єй творчость. Наслїдно повів пару слов о выставленых творах авторкы: „Основов вецерёх образів є повіданя о бісїдї Ісуса і Самарітанкы коло студника захопленой в Євангелію Яна 4; 5-42. Є то повіданя особной стрїчі, але головнї особного приятя. Велика бісїда, котра змінила сердце Самарітанкы. Як говорить умелкыня, є то сітуація, котра не мала ся стати. Хрістос не мав што робити в самарьскім селї, жена не мала іти на полудне ку студнику, ішла там в незвычайну годину, жебы ю нихто не стрїтив. Але праві тота незвычайна сітуація веде ку подстатному зажытку. Повіданя указує на вольбу Ісуса найти чоловіка, найти го і в ёго самотї, ізолації, грызїню совісти. Є то о Богу і чоловіку. Є то о реалній надїї в неочекованых сітуаціях.” Ботек продовжовав, же біблічне повіданя авторка не ілуструє, але же го лем назначує выбраныма фраґментами постав, їх ґестами, предметами і жебы чоловік порозумів, мусить ся успокоїти і зачати думати.
По словах куратора выставы выступила сама авторка з великым подякованём адресованым орґанізаторам, родинї, приятелям і вшыткым притомным гостям. Вернісаж освіжыв своїм співом Петер Ондрія. По недовгім концертї ся навщівници вернісажі выбрали обзерати унікатны авторчіны творы.
Мґр. Домініка НОВОТНА, інтерна докторандка Інштітуту русиньского языка і културы Ппяшівс кой універзоты.
