23. 7. 2024: Войновый цінтерь в Стропкові став Народнов културнов памятков
Войновый цінтерь із Першой світовой войны в Стропкові став Народнов културнов памятков. Стропків так має уж десять обєктів записаных в тім списку. Інформує о тім офіціалный сайт міста.
Місто цінтерь вєдно із каплічков зреконштруовало у 2018-ом роцї, при нагодї сторочніцї закінчіня Великой войны. „Я барз радый, же із ініціатівы Крайского памяткового уряду в Пряшові, і наслїдно на основі рїшіня Памяткового уряду Словацькой републікы прибыла в Стропкові далша Народна културна памятка, і то войновый цінтерь із погребнов каплічков,“ повів пріматор міста Стропків Ондрей Брендза.
Векшыну творять австро-угорьскы вояци
Войновый цінтерь находить ся на теріторії містьского цінтеря і є вызначным історічным нерухомым документом, котрый припоминать войновы операції і їх ничівы резултаты в окресї Стропків із Першой світовой войны.
На цінтерї є похованых понад 700 вояків, причім при 690 мертвых познать ся їх державна приналежность. Іде о 647 автро-угорьскых і 43 російскых вояків. Векшына вояків похованых в окремых гробах впала на боёвім полю або вмерла в резултатї зранїнь. В масовых гробах суть векшынов похованы жертвы холеровой епідемії.
Унікатный цінтерь Йожефа Лампінґа
„Із архітектонічного боку іде о унікатне архітектонічне дїло вызначного мадярьского архітекта Йожефа Лампінґа, яке на теріторії Словакії не має аналоґію. Архітектонічна вартость цінтеря окрім продуманого концепту є і в ёго парціалнім архітектонічнім елементї – погребній, холеровій класіцістічній Каплічцї святой Варвары із 1832-го року,“ інформовав пріматор міста.
В рамках реконштрукції із 2018-го року быв на цінтерї збудованый памятник жертвам Великой войны, котрый сімболізує крыла ангела, і на котрім є подля імен записаных 332 дотеперь ідентіфікованых похованых вояків.
Як пише місто на своїм офіціалнім сайтї, Стропків і цїлый втогдышнїй окрес быв у часах Австро-Угорьской імепрії важнов стратеґічнов теріторіёв монархії. В передвойновім періодї, у 1911-ім роцї, місто стало центром воєньскых маневрів цїлой северовыходной части імперії за участи понад 100-тісячовой армады.
В тутешнїм каштелю быв втогды уквартелёваный і наслїдник трону – Франтїшек Фердінанд де Есте.
„Общественна вартость цінтеря є і в тім, же на ёго теріторії суть бік по боцї похованы вояци неприятельскых армій – австро-угорьской і російской. Іде о высокый прояв гуманности, котрый выходить із ідеї, же по смерти не є неприятеля,“ додав пріматор Брендза.
Петро МЕДВІДЬ, ЛЕМ.фм, языкова і ґрафічна управа: АРКСР.
