23. 7. 2021: Од авґуста 2021 зміны в КУЛТ МІНОР

Условія пропонованя і волеб членів до одборных рад Фонду на підпору културы народностных меншын (КУЛТ МІНОР), котры вырїшують о дотаціях, ся змінять.

Выходить то з новелы закона о Фондї на підпору културы народностных меншын, котра была прията словацькым парламентом і в середу 21-го юла 2021-го року єй підписала презідентка Словацькой републікы Зузана Чапутова. Аґентуру TASR о тім інформовав Лукаш Лацко з Оддїлїня комунікації презідентьской канцеларії.

В новелї закона о фондї коалічны посланцї уточнили дефініцію културной орґанізації народностной меншыны, як і евіденції културных орґанізацій, котры будуть обсяговати даны о културных орґанізаціях, котры можуть брати участь на выбераню і волїню кандідатів на членів одборных рад.

„Подля сучасного ставу на громадї орґанізацій односных народностных меншын можуть брати участь представителї орґанізацій, котры приголосять ся на вызву директора фонду і сповнюють законом становелены условія, і кедь реално не выконують жадны актівности,“ припомянули передкладателї новелы закона.

Новела має за цїль то, же свого представителя на волебну громаду односной народностной меншыны буде мати право пропоновати лем орґанізація, котра сповнює условія, і котра є записана у евіденції културных орґанізацій народностных меншын, і яка розвивать актівне дїяльстжво в области свого дїяня.

Новотов є, же меджі културны орґанізації народностных меншын подля новелы закона окрем мімовладных безпрофітовых орґанізацій доповнюють ся церькви, реліґійны общіны і юрідічны особы, котры свою юрідічну субєктівіту мають од церькви або реліґійной общіны, при котрых ся бере до увагы на їх шпеціфічне поставлїня, як і орґанізачны єдиніцї обчаньскых здружінь з окремов юрідічнов субєктівітов.

Новела закона о Фондї на підпору културы народностных меншын буде платна од авґуста 2021-го року. Новы вольбы одборных рад бы так уж мали быти по новому.

Закон о Фондї на підпору културы народностных меншын, котрым выникнув фонд як верейноправна інштітуція, быв схваленый владным кабінетом Роберта Фіца у 2017-ім роцї. В тім роцї пришли першы вызвы про народностны меншыны на рік 2018. Першы штири рокы вів фонд Норберт Молнар, котрый го зачав будовати од фундаментів. В юни 2021-го року была за нову директорку выбрата Алена Котванова. Молнар по закінчіню свого функчного періоду веце не кандідовав.

 

Петро МЕДВІДЬ, ЛЕМ.фм, ґрафічна і языкова управа: АРК в СР.

 

Script logo