23. 6. 2021: Уж в суботу «Лемківскє Літо»

По долгій пандемічній перерві вертают лемківскы імпрезы, якы вписали ся уж в постійный календар нашых подій на чужыні. Таком як раз імпрезом єст «Лемківскє Літо», цікава пленерова акция, яка одбуде ся уж в тоту суботу, 26. червця/юнія 2021 р. в Чмели, на Нижнім Шлеску.

На подію просит предовшыткым орґанізатор – православна парохія Св. Тройці в Любіні. В тогорічным проґрамі не бракне артистичных выступлінь, спортовых змагань ци забав про наймолодшых. Початок о 15.00 год.

Подія для вшыткых

«Лемківскє літо» то подія, яка доцільово єст рыхтувана, жебы підтримувати і популяризувати лемківску культуру головного в любіньскым повіті, але принимана єст она радо і через польскых сусідів. Орґанізаторы старают ся заінтересувати вшыткых жытелів реґіону і вказувати лемківску красу, представляючы рідну культуру, в тым хоральну і народну пісню, танці, кухню та лемківскій язык.

Тото вшытко будете могли стрітити дальшый уж раз в найблизшу суботу в Чмели. В проґрамі сут лемківскы народны і забавовы ґрупы. Як в попередніх роках, не повинно бракнути і польскых ансамблів, якы радо хотят презентувати ся на лемківскій сцені в Чмели.

Орґанізаторы заєдно голосят, што глядают охочых волонтерів, якы могли бы помочы при рыхтуваню «Лемківского літа». Охочых просит ся о контакт за майльовым адресом: cerkiew_lubin@op.pl.

Вартат додати, што місце одбываня ся подіі не єст припадкове. Чмель то село, якє по выгнаню являло ся сильным осередком прожываня Русинів на чужыні. По 1947 році до села і його околиц трафили жытелі Білцаревы, якы долгы рокы плекали рідну культуры (м.ін. Владимір Возняк, Семан Мадзелян, братя Ярослав і Петрао Трохановскы, Лука Возняк і великє чысло інчых люди одданых лемківскій справі).

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньскогом языка.)