23. 6. 2021: Архієпіскоп Кіріл призначеный до Верьховного трібуналу Апостольской сіґнатуры

Як інформує портал Vatican News, в понеділё, 21-го юна 2021-го року, Папа римскый Франціск призначів на пятьрічный період членів Верьховного трібуналу Апостольской сіґнатуры.

Меджі дванадцятёма особностями з різных народностей спомеджі кардіналів, архієпіскопів і єпіскопів, є і архієпіскоп Кіріл Василь (на фотцї), апостольскый адміністратор sede plena Кошіцькой ґрекокатолицькой єпархії.

В списку призначеных суть штирёми кардіналы: Джозеф Вілліам Тобін, архієпіскоп Неварку в США; Джеймс Майкл Гарвей, архісвященик Папской базилікы св. Павла за мурами; Ґергард Людвіґ Міллер, емерітный префект Конґреґації доктріны віры і Маріо Ґрех, ґенералный секретарь Сінода єпіскопів.

Папа Франціск єдночасно призначів і семох референтів Верьховного трібуналу Апостольской сіґнатуры спомеджі академічных одборників у области канонічного права латиньской церькви і восточных католицькых церьквей.

Верьховный трібунал Апостольской сіґнатуры (Signaturae Apostolicae Tribunal) є єдным із урядів Римской курії, і є верьховным судом, а єдночасно так само верьховным орґаном церьковной юстічной справы і справной юстіції Святішого Престола.

Петро МЕДВІДЬ, ЛЕМ.фм, ґрафічна і языкова управа: ред.АРК в СР, фото: Arcibiskup Cyril Vasiľ / FB.