23. 5. 2020: По карантенї обновлюють свою роботу русиньскы професіоналны тїлеса ТАД і ПУЛС

Вдяка увольнёваню рештрікцій в повязаню з коронавірусом можуть свою роботу обновити і русиньскы професіоналны умелецькы тїлеса – Театер Александра Духновіча і Піддукляньскый умелецькый людовый субор. Зряджователём обидвох тїлес є Пряшівскый самосправный край.

Піддукляньскый умелецькый людовый субор планує перед публіков выступити іщі в тій сезонї. Театер Александра Духновіча ся буде приготовлёвати на премєру новой пєсы, котру заграть аж в новій сезонї.

Повный ход русиньского театру, єднако як і Театру Йонаша Заборьского в Пряшові, котрый є так само під Пряшівскым самосправным краём, зачне 3-го авґуста 2020-го року. Значіть, театралны вакації будуть тот рік коротшы, і театры будуть приготовлёвати новы інсценації, котры публіка буде годна відїти правдоподобно зачатком септембра.

Інформовала о тім Леа Геілова з Оддїлїня комунікації і пропаґації Канцеларії председы Пряшівсого самосправного краю.

Продовжує ся в Детекторі лжи

Театер Александра Духновіча в Пряшові продовжує в рихтованю наштудованя пєсы під назвов Детектор лжи в режії Светозара Спрушаньского. З онлайн простору ся пробы перенесуть до просторів театру, при дотримованю строгых гіґєнічных наряджінь. Планована перемєра, котра мала одбыти ся 3-го апріля, натеперь перенесла ся на половину септембра.

„В місяцях май і юн театер векшынов занимать ся заяздовыма представлїнями (на селах, позн. ред.), в рамках котрых ся в сучасній добі в повній мірї не дають забезпечіти гіґєнічны рештрікції і наряджіня. Зато в юні і юлі будуть робітници театру черьпати доволенкы, припадно резервны вольна,“ конштатує директор театру Маріан Марко.

ПУЛС приготовить новый албум і юбілейный проґрам

Од першого юна до робочого процесу припоять ся ку технічно-господарьскым робітникам і умелецькы робітници вшыткых трёх частей Піддукляньского умелецького людового субору – балету, хору і орхестру. Робота так само буде выконована при дотримованю актуалных гіґєнічных наряджінь.

В першій половинї юна планує ансамбель з хором і орхестром записованя нового компактного діску. В другій половинї місяця, іщі перед закінчінём сезоны, хоче ПУЛС одограти дакілько выступлїнь. Зачаток новой сезоны натеперь планує на першого авґуста.

„В авґустї нас чекать реалізація выступлїнь, в рамках можностей і на фестівалах,“ говорить директор ансамблю Юрай Швантнер, котрый спомянув і то, же ПУЛС буде, окрем іншого, в осени приготовлёвати і і юбілейный концерт ку 65-ій річніцї выникнутя того умелецького ансамблю. Премєру бы хотїли одограти в першій половинї децембра.

Петро МЕДВІДЬ, ЛЕМ.фм