23. 5. 2017: Вышла книжка о метрополитови Лаврови

О єдній із найвызначнішых особностей Православной церькви 20-го столїтя, русиньскім родакови із села Ладомирова, в окресї Свідник, вышла в тых днях по словацькы писана книжка під назвов Метрополита Лавр – історічны і сполоченьскы условія ёго жывота і діяня (оріґ. Metropolita Lavr – historické a spoločenské okolnosti jeho života a pôsobenia).

Автором книжкы є брат небогого метрополиты Михал Шкурла, котрый за собов має вже дакілько написаных моноґрафій, ці о роднім селї, або о далшых вызначных особностях. Книжка мала свою презентацію в 19-го мая 2017-го року в Пряшові.

Протаґоніста той книжкы, метрополита Лавр (обчаньскым меном Василь Шкурла), походив, як вже было спомянуто, зо села Ладомирова. Якраз в тім селї быв в міджівойновім періодї православный Монастырь преподобного Йова Почаєвского, котрый став ся вызначным центром російской еміґрації по большевіцькім переворотї в роцї 1917 і нововыникнутой Російской православной церькви за граніцёв, пише ся в анотації книжкы.

„Монастырь быв єдночасно і центром пошырёваня православія на Словакії обще, а окремо на Пряшівщінї. Кідьже діяльство монастырьского братства была заміряна проти безбожной совєстьской влады, перед приходом совєтьской армады (1944-ый рік) монахы одходять до новой еміґрації, тотраз до Споєных штатів Америкы до Святотройцького монастыря в Джорданвілї. З нима одходить і 16-річный Василь Шкурла, котрый цїлый свій жывот присвятить служіню Православній церькви. В новім оточіню, далеко од близкых і родного краю, перешов вшыткыма ступнями монашества, од рясофорного монаха, аж по найвысшый сан – першоєрархы і метрополиты Російской православной церькви за граніцёв,“ продовжує анотація.

Была то якраз заслуга метрополиты Лавра, же 17-го мая 2007-го року в Храмі Хріста Спасителя в Москві быв по довгых десятьлїтях роздїлїня підписаный Акт о канонічній єдности Російской православной церькви за граніцёв і Російской православной церькви Московского патріархату. Книжка была писана ку десятій річніцї той історічной дії.

Хто быв метрополита Лавр

Метрополита Лавр народив 1-го януара 1928-го року. Як єденадцятьрічный вступив до Монастыря преподобного Йова Почаєвского в Ладомировій. У 1944-ім роцї одышов із монахами до Споєных штатів Америкы. У 1947-ім роцї став ся рясофорным монахом і прияв мено Лавр. У 1954-ім роцї закінчів Святотройцьку духовну семінарію в Джорданвілї. У роцї 1967 быв высвященый на єпіскопа. В роцї 1981 ся став архієпіскопом. Од 2001-го року быв метрополітом выходо-америцькым і нюйорьскым Російской православной церькви за граніцёв. У 2002-ім роцї ся офіціално стрітнув із презідентом Російской федерації Владиміром Путіном зо заміром зближыти свою церьков з Росісйков православнов церьквов Московского патріархата. Процес взаємных їднань завершыв ся о пять років пізнїше, 17-го мая 2007-го року в Москві. Умер метрополіта Лавр 16-го марца 2008-го року в Джорданвілї в США.

В Споєных штатах Америкы 4-го децембра 2015-го р. быв одкрытый бронзовый памятник із пєдесталом з ґраніту патріархови московскому і цїлой Руси Алексіёви ІІ. і метрополитови Російской православной церькви за граніцёв. Памятник находить ся коло Катедралного собору св. Александра Нєвского у Говелї в штатї Ню Джерсі, і є присвяченый в честь єдности Російской православной церькви за граніцёв і Російской православной церькви. Выробленый быв у Росії і быв пожертвованый од російского народа, жебы припоминав момент Акту о канонічній єдности.

Петро МЕДВІДЬ

 

Script logo