23. 5. 2016: Шеф порадцїв премєра Україны: „Русины єствують. Мам русиньске корїня.‟

Іван Міклош, вызначный словацькый економ, бывшый словацькый міністер і підпредседа влады русиньского походжіня ся у новій владї Володиміра Гройсмана став шефом порадцїв премєра. Як порадця на Міністерстві фінанцій Україны робив вже довшый час. У новій владї му было понукнуто і кресло міністра фінанцій, но условіє, же міністер мусить мати україньске обчанство, Міклош не быв способный сповнити.

Приятём україньского обчанства бы стратив тото словацьке, што Міклош і про словацькы медії веце раз повів, же бере за основный проблем того, жебы досправды став ся міністром на Українї, кідьже словацьке обчанство брав за свою пріоріту і не хотїв о нёго прийти. Перша влада Роберта Фіца в роках 2006 – 2010 зачала одоберати обчанство тым, котры здобыли обчанство іншой державы. Была то словацька остра реакція на мадярьску леґіслатіву, котра уможнила роздавати обчанство загранічным Мадярам.

Міклош але і так продовжує свою роботу на Українї, де є вже веце як місяць шефом продацїв премєра Гройсмана. Із той нагоды з ним україньскый портал НВ Бізнес зробив інтервю, в котрім ся редактор Іван Верстюк опросив і на Міклошово походжіня.

Верстюк ся Міклоша опросив ці є правда, што ся пише у Вікіпедії, же має україньске корїня. Міклош оправив редактора, кідь повів:

„Кідь мам быти точным, маю русиньске корїня. На Українї є приято думати, же окремый русиньскый етнос не єствує, но в реалности він екзістує. Я єм ся народив на северовыходній Словакії, де якраз і жыють Русины. Комуністічна Чехословакія не узнавала Русинів як етнос, зато ся вшыткы Русины брали за Українцїв. У документах моїх родічів было зазначено, же суть Українцї. У тім вопросї є іщі єден аспект – реліґійный. Мої родічі были ґрекокатолилами, але комуністы заказали Ґрекокатолиьку церьков, офіціално доволили лем російске православіє. На початку 1990-ых років люде наконець дістали право вырїшовати – ці суть Русины, ці Українцї, ґрекокатолици, або православны. Векшына вернула ся ку своїй русиньскій ідентічности і ґрекокатолицькій вірї. У тій векшынї і мої родічі,“ пояснёвав у інтервю Міклош.

Припоминаме, же Іван Міклош у 2011-ім роцї у списованю населїня записав собі русиньску народность. В кампанї перед списованём дав своє выголошіня русиньскым орґанізаціям о своїм русиньскім походжіню і о тім, жебы ся люде голосили ку своїй народности. Тото выголошіня было выдруковано на плаґатах, котры ся дістрібуовали міджі людей.

П. М.