23. 4. 2019: Про рай Лемків в Краю Басків

Лемківскій Ансамбль Пісні і Танця «Кычера» з нагоды 25-літя свойой діяльности награл ретроспективный фільм про жытя Лемків в Карпатах. Был він першыраз вказуваный на подіі «Кычерияда над Качавом», яка проходила влони, в днях 22.-27. жолтня/октобра в Ліґници. Тепер фільм вышол поза лемківскы кругы. Вказаный был хоц бы в Басконіі.

«Там досправды жыли сме як в раю» то оповіданя о втраченым лемківскым світі, якій ненарушеный істнувал до зачатку ІІ світовой войны, пак прорваный воєнныма змаганями і першыма переселінями на Украіну, пак другом фальом в 1945 р., аж по насильну депортацию на понімецкы землі Польщы в 1947 р. Екранізация была зрыхтувана членами колективу, якым допомагали представникы старшого поколіня переселенців. «Продукция ансамблю Кычера є такой аматорском продукцийом, але рушат серця. Вказує она на глубины лемківской душы. Прикликує до рефлексиі. Дає звіданя о выгнаня, як і сенс жытя. Через сесе фільм являт ся універсальным, зрозумілым не лем для самых Лемків. На пакіст вшыткому, дає жытя, дає надію», могли сме чытати в запрошыню на премєру, яка одбыла ся жолтни/октобрі в Ліґници.

Заінтересуваны познаняньом долі Лемків через фільм были представникы Басків – меншынового народу, якій жыє в західній Европі, а його головне населіня находит ся в історичным реґіоні Краіны Басків (Басконіі). Зато же «Там досправды жыли сме як в раю» вказано в Басконіі вчас 21. Коррікы – фестівалю, якій в своій заплянуваній формі вандрує Басконійом. Його ціль то промувати баскійскій язык, але тіж через тото зберати фонды на дальшу його популяризацию і вчыня. За десят днів учасниткы фестівалю перебігли 2,5 тис. км. Корріка тырвала од 04.-14. квітня/апріля т.р.

В рамках реченой подіі лемківску екранізацию вказано в Сан Себастиян (по баскійскы: Доностия). Як інформувал нашу редакцию ініциятор накручыня фільму і ведучый ансамблю «Кычера» в Ліґници, тота тридцетминутова екранізация  вказана буде і в Каліфорніі, в Сан Франціско.

Севериян КОСОВСКЫЙ, лем.фм

(Публікуєме в оріґіналї – лемківскім варіантї русиньского языка.)