23. 3. 2020: 23-їй марец є Світовым днём Русинів

23-їй марец є записаный в русиньскім календарї як Світовый день Русинів. Тото свято было схвалене у 2017-ім роцї Світовым конґресом Русинів, котрый проходив у хорватьскім Осієку.

Датум быв выбрата на день, коли закінчів ся 1-ый Світовый конґрес Русинів, якый проходив 22-го аж 23-го марца 1991-го року в Меджілабірцях і ёго головным орґанізатором была Русиньска оброда. Участныма были втогды представителї Русинів з втогдышньой Чехословакії, Польщі, іщі все Совєтьской Україны, Северной Америкы і втогдышнёй Югославії.

Зачаток возродного руху

1-ый Світовый конґрес Русинів наштартовав новодобый возродный процес Русинів во вшыткых областях културно-сполоченьского і хрістіаньского жывота в окремых державах.

На конґресї в Меджілабірцях ёго участници здобыли першы інформації о жывотї Русинів в окремых країнах, надвязали першы меджінародны контакты і договорили ся на конкретній сполупраці. За найосновнїше той стрїчі мож брати то, же Русины встановили собі смілы конкретны цїлї і поступы, як досягнути вызнаня і зрівноправніня Русинів у своїх країнах.

Офіціалны святкованя затля лем раз

Хоць Світовый день Русинів быв выголошеный у 2017-ім роцї, затля офіціално святковав ся лем раз. Было то у 2019-ім роцї.

Світова рада Русинів вєдно із Русиньсков обродов на Словеньску і містом Меджілабірцї дня 23-го марца 2019-го року зорґанізовала в Меджілабірцях святочну академію, котров собі Русины припомянули 28-му річніцю од проходжіня 1-го Світвого конґресу Русинів а вєдно з тым торжествовали і Світовый день Русинів.

Академія зачала в пополідняйшых годинах при памятній таблї, котра є на Домі културы в Меджілабірцях, значіть будові, де конґрес у 1991-ім роцї проходив. На події брали участь Русины із Словакії, Польщі, Мадярьска, Румунії і Сербії. Пак проґрам продовжовав в просторах Містьского уряду в Меджілабірцях. Участь брав і председа Світового конресу Русинів Штефан Лявинець.

Тот рік жадны святкованя оголошены не были. Світ боює проти пошырёваня нового тіпу коронавірусу і так бы ани не было молжне робити даякы културно-сполоченьскы події, кедьже суть у векшынї держав заказаны.

Окрем Світового дня Русинів, окремы членьскы державы мають выбраты і свої локалны днї Русинів, котры одказують на даяку історічну дію, яка є повязана в тій державі з Русинами.

Петро МЕДВІДЬ, ЛЕМ.фм