23. 3. 2018: Світовый день Русинів

На остатнїм Світовім конґресї Русинів (СКР), котрый проходив од 29-го юна до 2-го юла 2017-го року в хорватьскім Осієку, было вырїшено, же 23-їй марец буде шторік святковати ся як Світовый день Русинів.

Дата была выбрата на день, коли закінчів ся 1-ый Світовый конґрес Русинів, котрый проходив 22-го аж 23-го марца 1991-го року в Меджілабірцях і ёго главным орґанізатором была Русиньска оброда. Участныма были втогды представителї Русинів зо Словакії (втогды іщі Чехословакія), Польщі, Україны, Северной Америкы і Сербії.

 

Тот першый світовый форум русиньской комуніты мав велике значіня главнї в тім, же наштартовав новодобый возродный процес Русинів во вшыткых областях културно-сполоченьского і хрістіаньского жывота в окремых державах. На конґресї в Меджілабірцях ёго участници здобыли першы інформації о жывотї Русинів в окремых країнах, надвязали першы меджінародны контакты і договорили ся на конкретній сполупрацї. За найосновнїше той стрїчі мож брати тото, же Русины встановили собі смілы конкретны цїлї і поступы, як досягнути узнаня і зрівноправнїня Русинів у своїх країнах.

 

1-ый СКР по першый раз схвалив Світову раду Русинів (СРР) як найвысшый выконный орґан, котрый буде діяти меджі двома засїданями конґресу. Конґрес схвалив і свого першого председу, котрым став ся Василь Турок-Гетеш, і котрый стояв на челї той меджінародной орґанізації повных 10 років.

 

Окрем Світового дня Русинів, окремы членьскы державы мали выбрати і свої локалны днї Русинів, котры одказують на даяку історічну дію, котра є повязана в тій державі з Русинами.