23. 12. 2024: Літературный конкурз выграла дебутантка Леа Васькова

20-го децембра 2024-го року в просторах Consilium maius Ректорату Пряшівской універзіты В Пряшові одбыло ся выголошіня резултатів 11-го рочника Літературного конкурзу Марії Мальцовской.

До конкурзу, котрый шторік орґанізує Сполок русиньскых писателїв Словеньска, можуть авторы із Словацьой републікы заганяти творы, котры іщі не были перед тым публікованы. Тот рік свої тексты загнало сім авторів, в конкурзї была поезія і проза.

Із семох авторів аж трёми тот рік были дебутантами, котры до конкурзу загнали творы першый раз, і котры не мають выдану жадну книгу. Творы оцїнёвала одборна порота в складї Кветослава Копорова – председкыня Сполку русиньскых писателїв Словеньска, Михал Павліч і Аліца Вєтошевова.

Меджі неоцїненыма авторами зістали тот рік Миколай Коневал, Мірослав Жолобаніч і Моніка Даґан, котра у конкурзї дебутовала з прозов про дїти.

Порота вырїшыла, же тот рік удїлить дві третї місця. Здобыла го далша дебутантка – Анна Замутовска із прозовым твором під назвов Подобы, а Марія Шмайдова, яка уж має выданы книгы а до конкурзу загнала прозу з назвов Алменія і лопуховый лист.

Друге місце тот рік порота придїлила Людмилї Шандаловій, котра в конкурзї змагала ся із поезіёв. Перше місце здобыла Леа Васькова, третя з тогорочных дебутантів, котра до конкурзу загнала так само поетічны творы.

Перед выголошінём резултатів 11-го рочника Літературного конкурзу Марії Мальцовской одбыла ся членьска громада Сполку русиньскых писателїв Словеньска, в рамках котрой членове потвердили свої орґаны, обговорили планы до 2025-го року, а так само занимали ся різныма проблемами, з котрыма писателї стрїчають ся.

Петро МЕДВІДЬ, ЛЕМ.фм, языкова і ґрафічна управа: АРК в СР.