23. 12. 2021: Гелена ҐІЦОВА-МІЦОВЧІНОВА: До храму Божого дверї незаперты (Стихы)

Гелена Ґіцова-Міцовчінова

 

До храму Божого дверї незаперты

 

***

Чом колядкы уж співають

Іванко із братом?

Од радости, же близенько

Рождественне свято.

 

На ялинцї посыпаны

стрїбром конарикы,

бо з новинов уж злїтають

з неба ангеликы.

 

Яку тайность вызрадила

камараткам Зузка?

Же чекають люде в світї

з дарами Ісуска.

 

Люде в церькви заспівають

на многая лїта,

же ся на світ уж народив

выкупитель світа.

 

Жебы ся нам до віночка

любов, віра, надїй сплела

а ку щастю в світї люде

кличуть Архангела.

 

А як вечур до постілкы

дїти спати ляжуть,

свої просьбы до Ісуска

з узлика розвяжуть.

 

При Отче наш і Богородіцї

вєдно рукы зложать

а родину од напасти

хранить Мати Божа.

 

***

Хто одповість,

што ся дїє,

же ся цїлый

світ радіє.

 

У Віфлеємі

і ангелы

штось радосне

увідїли,

з новов справов

аж на землю

прилетїли.

 

Летять гостї

уж горами

а пастырї

понагляють

із дарами.

 

А в пещерї

уж родина

на соломі

постілочку

вночі стелить

про нашого

Спасителя.

 

***
Кого же то

при пещерї

мати Божа

днесь стрїтила,

же так ясно

з неба звізда

засвітила.

 

Там пастырї

Заспівали,

словом Божым

Спасителя

прославляли.

 

Отець Йосиф

при колысцї

уж молив ся,

же сын Божый

народив ся.

 

(З приправлёваной книжкы авторкы – Капкы росы.)