23. 10. 2021: Уж і інформачны значкы на драгах можуть быти в языках меншын

Схвалена новела закона буде платна од нового року.

Інформачны дорожны значкы в селах і містах будуть годны быти, окрем словацького языка, написаны і в языках народностных меншын.

Таку новелу закона о хоснованю языків народностных меншын в середу, 20-го октобра 2020-го року, схвалили посланцї Народной рады Словацькой републікы. До закона ся запроваджать можность хосновати в селах і містах інформачны дорожны значкы з назвов вызначеных цїлїв в державнім языку, і в языку народностной меншыны.

Уповномоченый є спокійный

„Вчера парламент схвалив новелу языкового меншынового закона, в котрій уточнив і посилнив існуючі языковы права меншын при дорожнім значіню і транспортных заряджінях. Я радый, же публічна і одборна діскусія за остатнї тыжднї, і наперек тому, же ся до діскусії принесли і особны інвектівы, помогла одстранити хыбы первістной пропозіції новелы,“ написав на своїм офіціалнім профілї на сїтї Facebook Ласло Буковскый, уповномоченый влады Словацькой републікы про народностны меншыны і етнічны ґрупы.

Буковскый тым непрямо вказав на пропозіцію новелы од депутата Дёрдя Дімешія, котра была крітікована нелем уповномоченым, але неґатівне становиско ку тому прияв і Выбор про народностны меншыны і етнічны ґрупы. Пропозіція Дімешія мала хыбы, котры бы, наопак, меншыновы языковы права могли ослабити.

„Тїшыть ня, же наконець в тім дїлї брало ся до відома увагы Выбору про народностны меншыны і етнічны ґрупы а моє становиско, котре єм на основы вызвы председы Народной рады Словацькой републікы передложыв ґесторови закона,“ продовжовав Буковскый з тым, же вірить, же при аплікації закона будуть односны орґаны потрїбным способом рефлектовати зміну закона.

Зміна од нового року

Дотеперь в языку народностной меншыны писала ся назва села або міста на значках, котры означовали їх зачаток або конець, на будовах орґанів верейной справы, на публічных будовах, желізнїчных станіцях і заставках, як і на далшых выбраных місцях.

Новела розшырить двоязычность на Словакії о далшы значкы. Нова леґіслатіва має быти платна од 1-го януара 2022-го року.

Петро МЕДВІДЬ, Лем.фм. Ґрафічна і языкова управа: ред. АРК в СР.