22. 8. 2016: Народны новинкы – то суть Русины на Словакії

Кібы ся ня дахто в загранічу опросив, хто суть Русины і укаж мі дашто русиньске, так бы єм вытяг Народных новинкы або часопис Русин і указав му їх зо словами: Русины суть народ жыючій під Карпатами, пишуть азбуков і бісїдують русиньскым языком, якый поужывають Народны новинкы і Русин.

На Словакії не є ніч на 100 процент русиньске, лем тоты два высше уведжены русиньскы періодічны выданя (а в послїднїм часї і молоденькый Інфо Русин). Доволю собі зафілозофовати: якбы Народны новинкы і Русин перестали выходити, так бы ся перестало у світї відїти, чути і бісїдовати о Русинах на Словакії.

Як сьме вєдно з братом (о. Ґораздом Андріём Тімковічом, ЧСВВ) зачали выдавати одборный теолоґічно-історічный часопис Кранобрідьскый зборник, єден екзеплар сьме дали і до державного таліаньского архіву і книжніцї до Ґроттаферрата коло Рима. Тамтешнїй архіварь, котрый о. Ґоразда А. Тімковіча, ЧСВВ познав зо штудій у Римі, нам одписав і подяковав, як і пожелав довгый жывот нашому часопису. В тім часї подобный часопис не выдавали ниякы універзіты на Словакії, ани не знали, же такы часописы треба выдавати. Зачали свої часописы выдавати аж о пару років пізнїше. То значіть, же думков выдавати одборный теолоґічно-історічный часопис, сьме на Словакії передбігли добу. Пожеланя довгого жывота з таліаньского Ґроттаферрата нас несподївав, чом пожеланя довгого жывота про часопис? Гей, часопис ці новинкы суть жывы, покы ся выдавають і люде їх чітають. Як ся перестануть выдавати з будь-якой прічіны, так уж не суть жывы, вмерли. Жывот їм дають ёго редакторы. Наш Краснобрідьскый зборник жыв лем три рокы, бо го заказали латиньскы нежычливцї ґрекокатоліцізму. Умер як маленька трирічна дїтина. Але Народны новинкы ся дожыли 25 років!

І Народны новинкы уж мали пару раз вмерти, главно про недостаток фінанцій або нерозумны прічіны орґанізації, котра стояла на їх зачатку, але, нащастя, шефредактор новинок Мґр. Александер Зозуляк і круг коло нёго сі не дали одобрати дяку їх выдавати цїлых 25 років. Словацька републіка дотеперь все нашла фінанції і так Народны новинкы і Русин вєдно уж 25 років бок по боку утримують ся при жывотї. Спочатку Народны новинкы выходили кажды два тыжднї, потім каждый тыждень, так зась кажды два тыжднї, а теперь раз місячно. Але дыхають, выходять – жыють.

Ґратулуєме Народным новинкам к 25 рокам жывота і желаме їм, як  і часопису Русин, нелем сто років жывота, але і жебы выходили частїше!

 

о. Йосафат В. ТІМКОВІЧ, ЧСВВ, Кошіцї