22. 8. 2016: Дорогі и честовані редакторы! Народны новинкы – то не лем ваша, но i наша новинка,..

... бо мы єї з інтересом читаєме и дуже чекаєме, коли прийде новоє число. Назва „Народны новинкы" не случайна: они выходять для народа, поддержувуть народный дух, живлять народну русинську свідомость, из великым інтересом читавуться народом. Сеся новинка учить, як русинам боротися за себе, за свої историчні права. Она четвертину столітя тоже бореся за своє существованя и у сій борьбі укріплять свої силы. Выдає єї неутомиый русин, розумный, дипломатичный, незламный у свойих ідейных и націоналных позиціях и честованій нами Александер Зозуляк. Народні новинкы наповнены великым числом научної інформації, они для нас суть хроникалным документом не лем про житя русинів Словакії, но и русинів цілого світа. Не забывавуть Народны новинкы за подкарпатськых русинів, котрї у давных часах складали єдно цілоє из русинами Пряшевщины аж до Попрада, за їх нерозрішимі проблемы. Новинка тематично многопроблемна, она глубоко научно вырішує проблемы кодифікації русинського языка, русинської литературы, исторії, народної обрядности, не забывать про юбілеї выдатных русинів. Кедь изробити подшивку ушиткых выданых чисел єднов книжков, то мы бы мали малу русинську енциклопедію. Можеме сміло повісти: у Новинках нико не забытый и нич не забыто. Туй задокументованы и сохраняться на довгі часы факты русинської исторії и културы русинського народа, што дає нам право повісти ище єдно порунаня: новинкы – се наш русинськый архив.

Мы дуже дякуєме Александру Зозуляку за його титаничну роботу, за то, што не забывать про нас и заганять нам регуларно каждоє новоє число. Желаєме и другым сотрудлникам великого здоровля и много творчых сил "на многая и благая літа".

 

Михаил АЛМАШІЙ, Ужгород

(Публікуєме в оріґіналї – підкарпатьскім варіантї русиньского языка.)