22. 7. 2022: Гелена ҐІЦОВА-МІЦОВЧІНОВА: Стишкы

Гелены Ґіцовой-Міцовчіновой

***

Уж на меджі ниже села

Малёваны крячкы

А з криком на чуджіну

Летять дикы качкы.

 

Постїгала спонад лїсїв

Осїнь уж палету

І шовковы трамполины

Павукы не плетуть.

 

А у небі злате сонце

Джмурить свої очка

А спід стрїхы одлетїла

В зграйцї ластівочка.

 

Не выгравать цверчок в гаю:

Гойдана, гойдана,

Бо в небеснім морї плавать

Хмарка заплакана.

 

***

Зашептали

Рано мушкы

На порадї,

Же поздував

Зрїлы грушкы

Вітор в садї.

 

Коштовати

Перелетять

До сусїды

Через плїт,

Бо там грушкы

Солоденькы

Так як мед.

 

***

До долины

Лем без трубы,

Лукы, гаї

Перезлечі

Уж нарубы.

 

Зажурены

Слызны ланы,

Бо заперать

Лїто красне

Златы браны.

 

І заснене

Смутне поле,

Же стернянка

Ножкы коле.

 

Помаленькы

Сонце ясне

В небі гасне,

Бо одлїтать

Лїто красне.

 

(Выбране з приправлёваной книжкы  Гелены Ґіцовой-Міцовчіновой – Капкы росы.)