22. 7. 2021: Одбыла ся стрїча представителїв народных рад (націоналных совітів) Словаків і Русинів

У суботу, 17-го юла 2021-го року, одбыла ся в Руськім Керестурї робоча стрїча, на котрій брали участь представителї Народной рады Словаків і Народной рады Русинів у Сербії. Інформовала о тім аґентура Рутенпрес.

На стрїчі были підписаны русиньска і словацька верзія меморандума о сполупраці тых двох рад. Припоминаме, же меморандум быв підписаный в сербскім языку іщі в апрілю в Старій Пазові. При підписованю быв участный і Мілан Ян Піліп, председа Уряду про Словаків жыючіх в загранічу, котрій на своїй робочій навщіві у Сербії, окрем Словаків, навщівив і Русинів.

На стрїчі в Руськім Керестурї свої скушености представили і вычеряли собі підпредседа Народной рады Словаків Златко Шімак і председа Народной рады Русинів Борислав Сакач, як і председове штирёх секцій тых двох народных рад.

Як інормовала аґентура, участны робочой стрїчі дішли до заключіня, же русиньска і словацька народностна меншына, значіть обидва рады, мають много сполочных тем і же суть до два близкы народы. Дефіновали ся і подобны або сполочны проблемы у штирёх обласятх културной автономії.

Стрїча была першым кроком при творїню будучой сполупраці. Рады Русинів і Словаків хотять сполочно рїшыти проблемы і передкладати їх перед державу на вшыткых уровнях. Як підкреслив председа Народной рады Русинів, меморандум дає можность двом радам вєдно писати проєкты, через котры ся здобывають грошы.

Участны робочой стрїчі навщівили в Руськім Керестурї і Катедралный собор св. отця Николая Чудотворця, де їх привітав містный парох Михайло Малацко.

Петро МЕДВІОДЬ, ЛЕМ.фм, ґрафічна і языкова управа: ред. АРК в СР, жрідло фотоґрафії: РутенпреС.

Script logo