22. 5. 2020: На будові арешту в Леополдові одкрыють таблу єпіскопови Ґойдічови
В понеділёк, 25-го мая 2020, на будові Заряджіня на выконаня кары однятя свободы в Леополдові буде одкрыта памятна табла пряшівскому єпіскопови, блаженому Павлови Петрови Ґойдічови ЧСВВ (позн. ред.: на фотцї впередї першый справа, вєдно з блаженым єпіскопом Василём Гопком), котрый быв удостоєный і тітулом Справедливый меджі народами.
Як інформовала Пресова канцеларія Конференції єпіскопів Словакії (TK KBS), памятну таблу в дополїдняйшых годинах одкрыють пряшівскый архієпіскоп і метрополіта Словакії Іоан Бабяк, підпредседа Централного союзу жыдівскых реліґійных общін в Словацькій републіцї Іґор Рінтел і председа Народной рады Словацькой републікы Борис Коллар.
На одкрытю будуть брати участь і председа Тырнавского самосправного краю Йозеф Віскупіч а ректор Тырнавской універзіты Рене Білік.
Напланована і конференція
В тот самый день пополїдне буде проходити онлайн конференція о жывотї блаженого єпіскопа Павла Петра Ґойдіча і о діалоґу меджі хрістіанами і жыдївсков комунітов.
Выступати на ній будуть реномованы особности із Словакії, но і зо заграніча. Вступне слово буде мати кардінал Курт Кох, председа Папрской рады на підпору єдности хрістіанів. Конференція без презенчной участи лекторів буде в прямім ефірі высылана на сторінцї Židia na Slovensku на сітї Facebook.
Обидві події суть резултатом інтензівной, консензуалной і хосенной сполупраці Централного союзу жыдівскых реліґійных общін в Словацькій републіцї і хрістіаньскых церьквей на Словакії, інформовала пресова канцеларія.
Справедливый меджі народами
Перед 70-ма роками одбыв ся такзваный Пряшівскый собор. Комуністічны власти ним на довгы рокы заказали Ґрекокатолицьку церьков у втогдышнїй Чехословакії. Многы ґрекокатолицькы священици і єпіскопы скінчіли в леополдовскім арештї.
Меджі нима быв і єпіскоп Павел Петро Ґойдіч, котрый перед 60-ма роками в арештї вмер. Но і там, в строго стороженім арештї, зістав вірный своїм вартостям. Якраз тоты му не дали пасівно призерати ся на траґічну судбу словацькых Жыдїв у войновых часах.
Сам многых уратовав. За тото быв удостоєный in memoriam престіжным тітулом удільованым тым, котры уратовали Жыдів – Справедливый меджі народами. І зато є єпіскоп Павел Петро Ґойдіч, окрем іншого, і сімболом одвагы і порозумлїня меджі хрістіанами і Жыдами.
Петро МЕДВІДЬ, ЛЕМ.фм