22. 5. 2020: Выголошіня уповномоченого влады СР про народностны меншыны

В наслїдку того, же ся обявьла хворота COVID-19 (коронавірус) стоїть Словакія перед найвекшов безпечностнов вызвопв прошлых десятьроч. Влада СР із платностёв од 16. марца 2020 выголосила крізовый став і прияла далшы рештрікції на забранїня шырїня коронавірусу меджі жытелями СР. Розшырїня коронавірусу выжадовало конкретны крокы і цїлосполоченьску інформачну кампань з боку одповідных.

Уповномоченый влады СР про народностны меншынбы (поз. ред.: Ласло Буковскый – на фотцї) зато забезпечів переклад основных інформацій о коронавірусї до мадярьского, ромского, русиньского, україньского і нїмецького языка і у сполупраці з Урядом верейного здравотництва СР были тоты інформації опублікованы на інтернетовых сторінках окремых реґіоналных урядів верейного здравотництва, респ. посланы прямо до міст і сел із ромскым, русиньскым, україньскым і нїмецькім жытельством.

Дня 11. марца 2020 уповномоченый писмом пожадав председкыню Централного крізового штабу СР панї Денісу Сакову, міністерку внутра СР, жебы при інформованю верейности в одношіню з грозьбов коронавірусу не забыло ся на належны установлїня меншынового языкового закона (§ 4 азац 6 зак. ч. 184/1999 З. з.), подля котрого ся в тзв. меншыновых селах/містах (котры суть уведжены у наряджіню влады ч. 221/1999 З. з.) інформації, назвы і ознамлїня односно огрожіня жывота, здравя, безпечности  або маєтку жытелїв уваджають про верейность і в меншыновых языках.

Зато єм вызвав орґаны верейной справы (містну штатну справу, села і міста), нима зряджены правніцькы особы (школы, културны, здравотны інштітуції атд.), правницькы особы (соціалну поістёвню, здравотны поістёвнї, здравотны інштітуції, шпыталї, обходны центры – напр. Теско, Білла, Єднота, Кауфланд, Лідл, ЖСР, Словацька пошта атд.) і фізічны особы – подникателїв, жебы у смыслї уведженого дотримовали закон і вшытка інформації, назвы і ознамлїня у связи із сучаснов сітуаціёв публіковати у меншыновых селах ай в меншыновых языках.

Недотримованя той повинности є справным деліктом і вшыткым повинным субьєктам грозить фінанчна покута од 50,- аж до 2 500,- евр!

Вірю, же дотриманём той повинности і ефектівнов формов інформованя верейности приспієме к безпечности і охранї нашыхы жытелїв!

Інтернетова сторінка ВЕТА, адреса: www.korona.gov.sk, перетлумачів із словацького языка: А. З.

Script logo