22. 3. 2021: „На каву“ з Варголовым музеём

Тырваючі рештрікції в повязаню з пандеміёв нового тіпу корнавірусу привели Музей модерного уменя Енді Варгола в Меджілабірцях ку перенесеню своїх актівностей до оналйн простору.

Як інформовала аґентура TASR, в четверь, 18-го марца спустив музей на соціалній сітї Facebook проєкт під назвов Coffee break. Посердництвом нёго буде Варголів музей штодень презентовати інтересности зо світу уменя. Од марца так само зачали в Меджілабірцях з проєктом Factory People.

„Coffee break є сістематічный, день што день приготовлёваный концепт короткых інформацій з цїлём будовати популарну музейну інформованость некунстісторічного характеру,“ повів про аґентуру Мартін Цубяк, директор музея з тым, же Музей модерного уменя Енді Варгола буде денно меджі 9.00 і 9.30 год. публіковати на своїм фанпейджі „ку ранній каві“ різны інтересности зо світу уменя і зо жывота, історії і діяльства музея.

Музей од зачатку марца так само приготовив новый едукатівно-презентачный формат Factory People.

„Раз до тыждня в нїм приближуєме умелецьке оточіня і людей, котры сполупрацовали з Енді Варголом, рушали ся в ёго безпосередной близкости, взаємно ся овпливнёвали, а тым овпливнёвали і вывой самого уменя у світї в другій половинї 20-го столїтя,“ повів Цубяк.

За ёго далшыма словами бы музей хотїв принести уменя прямо меджі людей. Інтерактівный проєкт з назвов 15 минут славы, в рамках котрого хоче Варголів музей дословно кочовати по словацькых містах і селах, бы радо зачали в апрілю. Но реалізація залежыть од актуалной пандемічной сітуації.

Петро МЕДВІДЬ, ЛЕМ.фн, языкова і ґрафічна управа: ред. АРК в СР, фото: Ян Штовка

Script logo