22. 3. 2018: В Пряшові засїдала русиньска секція порадной ґрупы

21-го марца 2018-го року в Пряшові проходило перше засїданя русиньской секції Порадной ґрупы про забезпечіня гармонізації практікы з чінным законом о хоснованю языків народностных меншын.

Ґрупу створив Ласло Буковскый (на фотцї), уповномоченый влады Словацькой републікы про народностны меншыны і етнічны ґрупы, ку 18-му януару 2018-го року і была створена на період од 1-го фебруара 2018-го року до 31-го децембра 2020-го року. Має пять окремых секцій: про мадярьскый язык, русиньскый язык, ромскый язык, україньскый язык і нїмецькый язык.

 

На першім засїданю русиньской секції брали участь Ласло Буковскый, Алена Котванова – директорка Оддїлїня позіції і прав народностных меншын при Урядї уповномоченого СР про народностны меншыны і етнічны ґрупы і двоми членове русиньской секції Анна Плішкова і Петро Медвідь. Третій член, Мартін Дуфала, оправдав свою неучасть.

 

Уповномоченый про народностны меншыны наперед передав членам секції декреты, котрыма їх меновав до порадной ґрупы і пояснив сістему, яков бы мала секція, но і цїла ґрупа функціоновати.

 

Участны потім обговорили план роботы на тот рік, котрый є встановленый про вшыткых пять секцій, но і то, што бы ся могло далше в рамках аґенды рїшыти. На першый рік діяльства ґрупы є встановлено зробити тлумачіня, в нашім припадї до русиньского языка, выбраных меджінародных документів і словацькых законів. Меджі нима мож спомянути Рамковый договор на охрану народностных меншын, Европску харту реґіоналных або меншыновых языків, Конштітуцію Словацькой републікы ці Закон о хоснованю языків народностных меншын. Верзії тых документів в языках 5-ох народностных меншын, котры мають свої секції в ґрупі, бы мали быти публікованы в другій половині 2018-го року. Обявити бы ся мали на правницькім і інформачнім проталї slov-lex.sk, котрый справує Міністерство справедливости Словацькой републікы.

 

До будучности бы секція мала робити і на далшых документах ці урядных формуларях, жебы прията леґіслатіва нашла своє місце і в реалній практіцї на тых урядах, котры подля закона мають мати забезпечену комунікацію і в языку народностной меншыны. Коло той роботы може на пропозіцію членів порадной ґрупы прийти і ку корекції, припадно доповнїню термінолоґічных словників, котры были про народностны меншыны выданы у 2012-ім році.

 

П. М.