22. 2. 2019: Народностны справы (і по русиньскы) ідуть вже 10 років

Точно 13-го януара 2009-го року першый раз приголосили ся в державній Словацькій телевізії (Slovenská televízia) із кошыцького штудія Народностны справы. В тых днях Розглас і телевізія Словакії (Rozhlas a televízia Slovenska, RTVS) торжественно припомяне собі тот округлый юбілей.

Святковати мож нелем десятьрочніцю інформачного телевізного тыжденника про народностны меншыны, а і то, же то своёв формов єдиный проґрам і мож повісти піонїрьскый проєкт в рамках телевізного высыланя в Европі вообще, бо подобной релації не є.

 

Майже 400 выдань в языках народностных меншын

Од спомянутой даты было до 13-го януара 2019-го року одвысыланых 388 выдань того тыжденника. Як інфомровав RTVS, в тых выданях было зробленых цїлково 1700 репортажів. Были то інформації із жывота вшыткых 13-ёх державов вызнаных народноснтых меншын, котры жыють на Словакії. Народностны справы припоминають вшытко, чім народностны меншыны на Словакії жыють, ці уж то їх свята, традіції, памятны днї або вызначны културно-сполоченьскы події.

Народностны справы суть все модерованы в єднім із языків на Словакії вызнаных народностных меншын, в рамках проґраму ідуть пак репортажі і в іншых народностных языках. За десятьрічну історію проґраму были і выняткы, кедь в телевізії зазвучали і языкы такых меншын, котры не суть офіціално узнаны, наприклад, вєтнамскый, іспаньскый, французькый ці італійскый.

Народностны справы реґуларно ходять модерованы і по русиньскы. На русиньскых выданях довгодобо роблять Ярослава Сисакова і Валерія Фірєшова як модераторкы, і Петро Медвідь як тлумач сценаря. Репортажі забезпечує RTVS. Окрем того, ся в RTVS каждый другый тыждень выраблять і окремый Русиньскый маґазин. Тот зачав писати свою історію скорїше.

 

Одсвяткують в Кошіцях

Редакція народностного высыланя RTVS – телевізне штудіо Кошіцї собі округлу річніцю успішного і про народностны меншыны цїнного проґраму святочно припомяне дома, в Кошїцях, 26-го фебруара 2019.

Державна телевізія і такым способом хоче подяковати вшыткым, котры сполупрацують на творіню Народностных справ, проґрамі, котрый є богатый на языкы і на інформації. Як інформовала сторінка RTVS, державный телерозглас тїшыть ся із того, же історія Народностных справ продовжує і тот рік дале.

Петро МЕДВІДЬ, лем.фм