22. 11. 2020: В Ґладышові зачали будову новой православной церкви

Як інформує православна парохія св. Йоана Крестителя, в селі Ґладышів зачали ся роботы звязаны з поставліньом нового храму, котрый побудуваный буде в центрі села.

Нова ґладышівска церков буде припоминала неістнуючу деревяну церков свв. Космы і Даміяна з Незнайовой. Рішыня побудувати нову святыню приняте было перед парома роками.

Першы роботы

На пляци, де поставлена буде деревяна церков, зачали ся першы роботы повязаны з рыхтуваньом фундаментів. При зачатю робіт поставлена была мініятурка церкви, вказуючы на красу обєкту, котрый неодолга буде зложеный з дерева.

Проєкт ґладышівской святыні, на основі поміровой документациі церкви з Незнайовой, зрыхтувал консерватор памяток з Нового Санча Конрад Коханьскій, при спілпраци з Даміяном Новаком і Анджейом Жыґадлом, якы запропонували схоснувати первістны пляны незнаівского храму. Як бесідує Д. Новак, од зачатку концепция місцевого пароха, о. Аркадия Баранчука, была така, жебы нова церков припоминала тоту незнаівску. По проведеных консультациях рішено, што найліпше буде, кєд нова церков буде репликом, або што найменьше вірно навязувала до знищеного храму.

При зачатій будові од самого початку помагают місцевы парохіяне. Кєд поведе ся зробити вшытко на час, правдоподібно на яр будучого рока церков буде зложена зо зрыхтуваного на тоту ціль дерева. Проєкт нового храму был зрыхтуваный на основі захованой в архівах поміровой документациі незнаівской церкви. Документация тота была споряджена перед тым, як церков свв. Космы і Даміяна конечно завалила ся в 70. роках ХХ ст.

Ґладышівска парохія інформує, што охочы сперти будову новой церкви годны тото зробити посылаючы фонды на банковый рахунок: 20 8797 1039 0030 0399 2337 0002 з дописком «Будова церкви в Ґладышові».

Деревяна і лемківска

Незнаівска святыня была побудувана в 1780 р. в традицийным західньолемківскым стилю. Церков служыла вірным до 1930 р., коли в селі побудувано нову православну церков. Деревяна стара церков не была хоснувана од того моменту до періоду выселінь з 1945-47 рр. Фінально, завалила ся в 1964 р., а вежа впала 1973 в році. Была то єдна з красшых лемківскых церкви в реґіоні.

7. липця/юля 2018 р. в ден покровителя православной парохіі в Ґладышові, св. Йоана Крестителя, котрый є так само єдным з покровителів перемышльско-ґорлицкой єпархіі, по святочных богослужынях одбыло ся посвячыня креста і пляцу під будову нового храму в селі. Крест і місце під нову церков посвятил архієпископ Паісий.

Такой по двох і піл рока по тій подіі зачала ся будова новой церкви. Дотля православны селяне молят ся в деревяній каплици св. Йоана Крестителя, (возн. в 1857 р., перебуд. в 1914 р.), яка находит ся при єдным з бічных пути в середині села.

Нова церков буде не лем деревяна, але так само буде поставлена в західньолемківскым стилю. Буде то такой перша того рода церков побудувана по ІІ світовій войні, котра своім выглядом припоминала буде в цілости деревяны, памятковы карпатскы храмы. Дотля, новы будуваны церкви на Лемковині, або в деякій мірі навязували своім выглядом до лемківского стилю (церков в Зындрановій, Креници ци Реґєтові) або представляют інчы формы, як напр. церквы в Білянці і Ґорлицях.

Севериян КОСОВСКЫЙ, лем.фм, фот.: о. Аркадій Баранчук

(Публікуєме в оріґіналї – лемківскім варіантї русиньского языка.)

Script logo