22. 10. 2020: Русинам в Мадярьску посвятили основный камінь деревяной церькви

Архієпіскоп метрополіта гайдудорожскый Філіп Кочіш 16-го октобра 2020-го року в рамках вечурнї поблагословив основный камінь деревяной церькви в Дебрецинї – части Йовжа , котра буде стояти коло русиньского дому – Русиньского ґрекокатолицького центра, якый быв святочно одкрытый в місяцї апріль 2019-го року.

На події брали участь Віктор Крамаренко – председа Вседержавного русиньского самосправованя в Мадярьску, заступник старосты міста Акош Балаж ці містный парох Чаба Сентешій. Інформацію принесли мадярьскы порталы.

Церьков буде і одказом на предків

Нова церьков про Русинів в Мадярьску є потребов, кедьже росне кількость русиньскых родин, кторы практікують свою віру. Єдночасно є лоґічным кроком, кедьже в минувшім роцї быв одкрытый і комунітный центер. Храм дотримать восточну традіцію і буде орьєнтованый на выход.

Як у приговорї повів метрополіта Філіп, то же церьков буде збудована з дерева, припоминать і бідных русиньскых предків, котры не мали ніч інше, і так будовали храмы з дерева, котре было в лїсї. Церьков з природного матеріалу днесь несе і окреме посолство і має унікатну атмосферу. Храм зо жывой матерії буде подля метрополіты выжаровати красу Бога іншакым способом.

Нова русиньска церьков буде присвячена Благовіщенію Пресвятой Богородіцї. Подля пароха Чабы Сентешія быв тот праздник выбратый зато, жебы ся на тім місцї людём передавала радость з Пречістой Дівы, радость з Бога.

Путницькый центер про Русинів Карпатьской котловины

Як повів представитель містной самосправы Акош Балаж, фундуш, на котрім уж днесь стоїть путницькый центер і буде там і церьков, місто даровало ґрекокатоликам у 2009-ім роцї. Вірить, же комунітный дім і церьков з того місця вытворять іконічный центер.

За словами председы Вседержавного русиньского самосправованя Віктора Крамаренка є Дебрецин-Йовжа про Русинів в Мадярьску централным пунктом. Деревяна церьков подля нёго зробить з того місця путницькый центер про русиньскых ґрекокатоликів із цїлой Карпатськой котловины.

Містна русинська самосправа дала на будованя храму 50 міліонів форінтів, што є понад 137 тісяч евр. Гайдудорожска архієпархія буде платити остаток вытрат. Цїлково ся рахує зо сумов коло 110 міліонів форінтів, значіть коло 302 тісяч евр. Храм бы мав быти докінченый в осени слїдуючого року. Наперед го поскладають в Семигородю, пак розоберуть, по частях перенесуть до Дебрецина, де го уж поставлять на своє місце.

Місце на стрїчі вже стоїть

Як вже было спомянуто, Русины в Мадярьску вже мають свій комунітный центер, котрый быв посвяченый в минувшім роцї і є так само деревяный. Будованя того дому фінанцовала мадярьска влада. На переднїй сторонї дому є русиньскый ерб і крест, котры поблагословив Папа римскый Франціск почас авдієнції мадярьскых Русинів у Папы в марцї 2019-го року.

В Мадярьску ся в остатнїм списованю населїня приголосило 3882 людей ку русиньскій народности, з того 1777 ку ґрекокатолицькій церькви.

Петро МЕДВІДЬ, лем.фм., жрідло фотоґрафій: Гайдудорожска архієпархія, языкова управа: ред. АРК в СР.

Script logo