22. 10. 2020: В Камянї в Меджілабірцях є скоро половина кліентів позітівных

В містьскім заряджіню про сеніорів Камяна в Меджілабірцях потвердили новый коронавірус скоро у половины кліентів. Позітівно тестованых было і сім із 19-ёх робітників заряджіня.

Про аґентуру TASR то у четверь, 22-го октобра 2020-го року, потвердив директор Камяны Андрій Дрібняк.

Кліенты суть затля без сімптомів

„Маєме 19 позітівно тестованых кліентів і сім робітників, ошетріователь і єдну здравотну сестру,“ повів Дрібняк з тым, же кліентів, як і робітників на основі резултатів тестів роздїлили до двох ґруп, причім позітівно тестованы робітници старають ся теперь о позітівно тестованых кліентів.

І кедь суть кліенты, котрых вік є коло 80 років і мають многы діаґнозы, подля директора Камяны суть затля без сімптомів, но боять ся о їх здравотный став, кедьже мають высокый вік. Натеперь не знав повісти, ці будуть в заряджіню знати выстарчіти з кількостёв робітників, котрых мають теперь.

„Є страх, дакотры можуть одмітнути прийти до роботы. Затля ся таке не стало, но не знаме, што буде далше,“ повів Дрібняк.

Меджілабірцї мали довго найменше інфікованых

Окрес Меджілабірцї довгый час быв єдным з тых, котры мали найменше хворых на новый тіп коронавірусу. Доста довго собі докінця в першій волнї пандемії тримав нулу в рамках інфікованых. Днесь тот найменшый окрес на Словакії, єдночасно найрусиньскішый, належыть на пандемічнім семафорі так само меджі червены окресы.

Одкыль ся взяли хворы і в Камянї директор не знав пояснити. Подля нёго то може быти повязане з мобілітов містных жытелїв за роботов. „Якбач, уж сьме в такій сітуації, же ся то не дасть доглядати,“ повів.

Петро МЕДВІДЬ, лем.фм, жрідло фотоґрафії: kamjana.sk, языкова управа: ред. АРК в СР.

Script logo