21. 9. 2024: В Стащінї бісїдовали о дїдовизнї Першой світовой войны в Полонинах

О дїдовизнї Першой світовой войны на теріторії Народного парку Полонины і северовыходї Словакії діскутовали у четверь, 19-го септембра 2024-го року, на варштатах в Стащинї, Сниньского окресу.

Цїлём той подїї было споїти самосправы, державны інштітуції і мімовладны орґанізації, жебы діскутовати о ефектівнім справованю той културной дїдовизны. Як про аґентуру TASR повіла проєктова манажерка Домініка Кусинова, подїю орґанізовала Справа Народного парку Полонины.

„Проєкт GOV4PeaCE є заміряный на створїня сполочной черезгранічной візії про справованя културной дїдовизны войновых дїй Першой світовой войны. Проєкт концентрує ся на тестованя новых приступів ку дізайну музеїв, творїня черезгранічных трас і підпору меджісекторовой сполупраці,“ додала Кусинова.

Участны на варштатах познакомили ся і з можностями научного баданя і ёго аплікаціёв на охрану і справу памяток. Так само презентованы были успішно реалізованы проєкты заміряны на дїї Першой світовой войны. Історіци представили ефектівны приступы ку ряджіню дїдовизны з років 1914 аж 1918, в тім чіслї ку стараня ся о войновы цінтерї.

Коордінатором проєкту є Мартін Дробняк із Клубу воєньской історії Бескіды. Тот повів, же пригранічны окресы днешнёго Пряшівского самосрпавного краю представлюють єдине місце на Словакії, котре почас Першой світовой войны было засягнуте боями.

„Видимым остатком войновых дїй на нашій теріторії є комплекс войново-історічных памяток на выходній Словакії. Найвекшу часть того комплексу творять войновы цінтерї, котрых є понад 200,“ доповнив Дробняк.

Проєкт GOV4PeaCE реалізованый є од мая 2024-го року до октобра 2026-го року і має 11 партнерів із шестёх держав. Главным цїлём є інтеґрація історічных місць Першой світовой войны до шыршых політік і стратеґій охраны културной дїдовизны. Фінанцованый є з Европского фонду реґіоналного розвитку.

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: Клуб воєньской історії Бескіды.