21. 8. 2024: Понад 10 тісяч людей пришло на святоуспеньскый одпуст до Лютины

На найвекшім путницькім місцї ґрекокатоликів на Словакії – в Лютинї, почас вікенду 17-го і 18-го авґуста 2024-го року зышло ся понад десять тісяч віруючіх на архієпархіалнім одпустї з нагоды праздника Успенія Пресвятой Богородіцї.

Інформовав о тім говорця Пряшівской ґрекокатолицькой архієпархії Михал Павлишиновіч.

Проґрам одпусту паралелно проходив у лютиньскій базиліцї в селї і на Маріяньскій горї над селом од суботы пополудне. Тот рік в недїлю рано о пів восьмой в Базиліцї Успенія Пресвятой Богородіцї была одслужена і церьковнославяньска літурґія з русиньскыма чітанями і проповідёв.

Головна торжественна архієрейска літурґія была в недїлю о десятій на Маріяньскій горї в церьковнославяньскім языку. Тоту одправляв Высокопреосвященый владыка Йона Максим, пряшівскый архієпіскоп і митрополіта. Вєдно з ним служыли і архієпіскоп Кіріл Василь – кошіцькый єпарха, владыка Мілан Лах – братїславскый помічный єпіскоп, і емерітный архієпіскоп кір Йоан Бабяк, як і дакілько десяток священик а двоми діаконы.

Торжественну літурґію одспівав Катедралный хор святых Кіріла і Мефтодія з Кошіць, і почас причастя збогатила одпуст своїм співом співачка народных і реліґійных співанок Моніка Кандрачова.

Путницька традіція в Лютинї почала в половинї 19-го столїтя. На праздник Преображенія Господа за юліаньскым календарём – 19-го авґуста 1851-го року, містній жытельцї Зузанї Фекете зъявив ся святый Николай.

По зъявлїнях, котры ся повторяли, віруючі на горї над селом поставили крест. Як доказ зъявлїнь святый Николай подаровав Зузанї ікону Богородіцї, котру мала передати священикови як дар до будучого храму.

Папа римскый Пій IX. выдав 24-го мая 1855-го року декрет о можливости прияти одпусткы в Лютинї. У 1988-ім роцї, іщі почас комуністічного режіму, быв храм в Лютинї Папом римскым Йоаном Павлом ІІ. выголошеный за Базиліку мінор. У 2010-ім роцї дістала Базиліка Успенія Пресвятой Богородіцї окремый духовный звяз із Базиліков Santa Maria Maggiore в Римі з прівілеґіёв повноміцьных одпустків.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Михал Петриляк.